पिरायस (एजेन्सी) – पूर्व यूरोकप विजेता ग्रिसलाई २-१ ले हराउँदै बेल्जियम विश्वकपमा छनोट भएको छ । विश्वकपमा छनोट हुने छैटौं राष्ट्र हुन पुगेको बेल्जियमका लागि जान भर्टोनघेन र रोमेलु लुकाकुले गोल गरेका थिए ।

ग्रिसमाथिको जितसँगै समूह ‘एच’मा २२ अंक बटुल्दै बेल्जियम यूरोप क्षेत्रबाट विश्वकपमा छनोट हुने दोस्रो राष्ट्र बन्यो । यसअघि रुस आयोजकका रुपमा स्वत: छनोट भइसकेको थियो । मेक्सिको, ब्राजिल, इरान र जापान पनि अन्य क्षेत्रबाट विश्वकपमा छनोट भइसकेका छन् ।

त्यस्तै समूह ‘ए’मा फ्रान्सले लक्जेम्बर्गसँग गोलरहित बराबरी खेलेको छ । यस नतिजाको बावजुद फ्रान्स १७ अंकसहित शीर्ष स्थानमा रहेको छ । समूहको अर्को खेलमा नेदरल्यान्ड्सले बुल्गेरियलाई ३-१ ले हराएको थियो भने स्विडेनले बेलारुसलाई ४-० ले पराजित गरेको थियो । नेदरल्यान्ड्सका लागि डेभि प्रपरले २ गोल तथा आर्जेन रबेनले एक गोल गरेका थिए ।

नेदरल्यान्ड्स १३ अंक सहित समूहको तेस्रो स्थानमा छ तथा स्विडेन १६ अंकसहित दोस्रो स्थानमा रहेको छ । त्यस्तै यूरोकप विजेता पोर्चुगलले हङ्गेरीलाई १-० ले हराएको छ । बुडापेस्टमा खेलिएको खेलमा आन्द्रे सिल्भाको गोलको मद्दतले पोर्चुगलले जित पक्का गरेको हो ।

हरेक समूहको शीर्ष टोली स्वतः  विश्वकपमा छनोट हुने हुँदा पोर्चुगलले आफ्नो समूह ‘बि’मा स्विट्जरल्यान्डलाई पछ्याई रहेको छ । पहिलो स्थानमा रहेको स्विट्जरल्यान्डको २४ अंक रहेको छ भने २१ अंक सहित पोर्चुगल दोस्रो स्थानमा छ । स्विट्जरल्यान्डले पनि गएराति लाट्भियामाथि ३-०को जित दर्ता गरेको थियो ।

गएरातिका अन्य खेलहरुको नतिजा –

क्रोयसिया १-० कोसोभो

एस्टोनिया १-० साइप्रस

फारो द्वीप १-० एन्डोरा

जिब्राल्टर ०-४ बोस्निया