म्याड्रिड (एजेन्सी) – यूरोपको विश्वकप छनोट चरणको खेलअन्तर्गत समूह ‘जी’मा दुई पूर्व विश्वकप विजेता स्पेन र इटाली आज राती १२.३० बजे म्याड्रिडमा भिड्दै छन् । समूहमा दुवैको समान अंक रहेकाले यो खेल दुवै टोलीका लागि निकै महत्वपूर्ण हुनेछ ।

समूह ‘जी’मा स्पेन र इटाली दुवै टोलीको ६ खेलमा ५ जित र १ बराबरीसहित समान १६ अंक रहेको छ । पछिल्लो पटक समूहमा स्पेन र इटाली भिड्दा खेल १-१ को बराबरीमा टुङ्गिएको थियो । हरेक समूहबाट मात्र एक टोली स्वत: विश्वकपमा छनोट हुनेछन् ।

यसैगरी इटालीले स्पेनलाई २०१६ को यूरोकपको अन्तिम १६ मा २-० ले हराएको थियो । त्यसैले आफ्नो घरेलु मैदानमा खेलिने यस खेल स्पेनका लागि प्रतिशोध लिने मौका पनि हो । समूहको अघिल्लो खेलमा इटालीले लेचिन्स्टाइनलाई ५-० ले हराएको थियो भने स्पेनले पनि म्यासेडोनियामाथि २-१ को जित निकालेको थियो । स्पेनका लागि दिग्गज स्ट्राइकर डेभिड भिल्लाले टोलीमा पुनरागमन गर्दै छन् भने इटालीका डिफेन्डर जर्जियो केलिनीले चोटका खेल गुमाउने छन् ।

नेपाली समय अनुसार आजका अन्य खेलहरु:

अल्बानियाविरुद्ध लेचिन्स्टाइन – ९.४५ बजे

फिनल्यान्डविरुद्ध् आइसल्यान्ड – ९.४५ बजे

सर्बियाविरुद्ध मोल्डोभा – ९.४५ बजे

जर्जियाविरुद्ध आयरल्यान्ड – ९.४५ बजे

वेल्सविरुद्ध अष्ट्रिया – १२.३० बजे

यूक्रेनविरुद्ध टर्की – १२.३० बजे

क्रोएसियाविरुद्ध कोसोभो – १२.३० बजे

इज्रायलविरुद्ध म्यासेडोनिया – १२.३० बजे