काठमाडौं (हाम्रो खेलकुद)– घरेलु मैदानमा अन्तिम खेल खेल्दै नेपाली राष्ट्रिय फुटबल टोलीबाट ५० ‘क्याप’ पुरा गर्ने अनिल गुरुङको योजना यस पटक पुरा नहुने भएको छ । घरेलु फुटबलमा छोटो समयमा प्रभाव पार्न सकेका त्रिभुवन आर्मी क्लबका फरवार्ड जर्ज प्रिन्स कार्की भने पहिलो पटक राष्ट्रिय टोलीमा मौका पाएका छन् ।

एएफसी एसियन कप छनोटअन्तर्गत ताजकिस्तानविरुद्धको खेलका लागि मुख्य प्रशिक्षक ग्यातुको कोजीको नेतृत्वमा रहेको प्रशिक्षण टोलीले २३ सदस्यीय टोलीको अन्तिम छनोट गर्दा अनिल अटेनन् । ताजकिस्तानकै खेलको तयारीका लागि जापान भ्रमणमा गएका अनिलसँगै गोलकिपर एलेन न्यौपाने, मिडफिल्डर राजेन्द्र रावल र रक्षक मानबहादुर तामाङले पनि अन्तिम छनोटमा स्थान बनाउन सकेनन् ।

अनिलले यसअघि जेठको अन्तिममा यमनसँग खेल्दै ४९ खेल पुरा गरेका थिए । टोलीमा अन्य खेलाडीमा भने खासै परिवर्तन भएको छैन । विदेशमा व्यवासायिक फुटबल खेल्दै आएका गोलकिपर किरण चेम्जोङ र रोहित चन्द यथावत टोलीमा समेटिएका छन् । नपाल र ताजकिस्तानबीच भदौं २० गते सातदोबाटोस्थित एन्फा कम्प्लेक्सको एस्ट्रो टफमा प्रतिस्पर्धा हुनेछ ।

छनोटअन्तर्गत नेपालले घरेलु मैदानमा खेल्न लागेको यो दोस्रो खेल हो । छनोट चरणभरमा नेपालले ३ होम र ३ अवे खेल खेल्नु पर्नेछ । जसमधये १ अवे र १ होम खेल नेपालले खेलिसकेको छ । यसअघिका २ खेलमा नेपालले १ मा हार र अर्कोमा बराबरी गरेको थियो ।

अघिल्लो बर्षको चैतमा फिलिपीन्ससँग ४–१ को हार बेहोरेको नेपालले जेठको अन्त्यमा घरेलु मैदानमा यमनसँग गोलरहित बराबरी खेलेको थियो । अंक तालिकामा शीर्षस्थानमा रहेको फिलिपिन्सको ६, यमनको ४, नेपालको १ र पुछारमा रहेको ताजकिस्तान अंक विहिन छ ।

ताजकिस्तानविरुद्धको लागि अन्तिम नामावली

गोलकिपर – विकेश कुथु, विशाल श्रेष्ठ, किरण चेम्जोङ

रक्षक – विराज महर्जन, जितेन्द्र कार्की, कमल श्रेष्ठ, दीनेश राजवंशी, अनन्त तामाङ, देवेन्द्र तामाङ, आदित्य चौधरी

मिडफिल्डर – हेमन गुरुङ , हेमन्त थापा मगर, विक्रम लामा, विशाल राई, सुजल श्रेष्ठ, सुनिल बल, रोहित चन्द, अञ्जन विष्ट, सुमन लामा

फरवार्ड – नवयुग श्रेष्ठ, भरत खवास, विमल घर्ती मगर, जर्ज प्रिन्स कार्की

प्रशिक्षक टोली – ग्यातुको कोजी (प्रमुख प्रशिक्षक), राजु शाक्य (प्रशिक्षक), उज्वल मानन्धर (गोलकिपर प्रशिक्षक)