लिभरपुल (एजेन्सी)– यो साता विश्व कप छनोट चरणका खेलहरु भएकाले युरोपिन लिगमा विश्राम छ । अन्तर्राष्ट्रिय खेलाडीहरु प्रतिस्पर्धाको तयारीमा जुटिरहेका छन् । अन्तर्राष्ट्रिय फुटबलमा यसअघि व्यवस्त रहने गरेका इङ्ल्यान्डका पूर्व कप्तान वायन रुनीलाई अहिले त्यस्तो चटारो छैन ।

कारण उनले केही दिनअघि अन्तर्राष्ट्रिय फुटबलबाट सन्न्यास लिइसकेका छन् । अर्को तिर रुनीकी श्रीमती कोलिन पछि अहिले छुट्टी माउने क्रममा देश बाहिर छिन् । यो परिस्थितिमा उनीसँग पहिला भन्दा फुर्सदको समय छ । जुन समय उनले साथीसँग विताउनु पनि स्वभाविक थियो ।

तर फुर्सदको समय साथीहरुसँग गरेको रमाइलो रुनीलाई महंगो परेको छ । एभर्टनका स्ट्राइकर रुनी रक्सी पिएर गाडी चलाएको आरोपमा शुक्रबार बिहान पक्राउ परेका थिए । इङ्ल्यान्डका लागि सर्वाधिक गोलकर्ता रहेका रुनीलाई प्रहरीले घर नजिकैबाट पक्राउ गरेको थियो । बिहीबार साँझ रुनी फुटबलर साथीहरुसँग इटालियन रेस्टुराँमा रमाइलो गरिरहेका थिए ।

तर घर फर्किने क्रममा उनलाई चेसाएर प्रहरीले स्थानीय समयअनुसार शुक्रबार बिहान ६ बजे रक्सी पिएर गाडी चलाएको आरोपमा पक्राउ गरेको थियो । रुनीले प्रहरीको तीन पटकसम्मको चेतावनीलाई बेवास्ता गरेका भनिएको छ । उनका क्लब एभर्टनले रुनीको पक्राउबारे केही बोलेको छैन ।

प्रहरी तथा रुनीको प्रवक्ताबाट पनि घटनाबारे विस्तृत जानकारी आउन सकेको छैन । १३ बर्षपछि यसै सिजन म्यानचेस्टर युनाइटेडबाट पूर्व क्लब एभर्टन फर्किएका रुनीले एभर्टनका लागि प्रिमियर लिगमा ३ खेलमा २ गोल गरिसकेका छन् ।

राष्ट्रिय टोलीका सर्वाधिक गोलकर्ता रहेका रुनीले इङ्ग्ल्यान्डका लागि १ सय १९ खेलमा ५३ गोल गरेका छन् । प्रिमियर लिगमा उच्च प्रदर्शन गरेपछि राष्ट्रिय टोलीमा फर्कने सम्भावना बाँकी रहँदै उनले अन्तर्राष्ट्रिय फुटबलबाट सन्न्यासको घोषणा गरेका थिए ।