भालेटा (एजेन्सी) – यूरोपको विश्वकप छनोट चरण समूह ‘सी’अन्तर्गत आज राती जर्मनी र चेक गणतन्त्र भिड्दै छन् । यसैगरी समूह ‘एफ’मा इङ्ल्यान्डले माल्टाको सामना गर्दै छ ।

प्रागको एडेन एरिनामा आज चेक गणतन्त्र विश्व वरियतामा नम्बर दुईमा रहेको जर्मनीसँग खेल्दै छ । समूह ‘सी’मा खेलिएका ६ खेलमध्ये जर्मनीले सबै खेल जित्दै १८ अंक बटुलेको छ भने समूहमा तेस्रो स्थानमा रहेको चेक गणतन्त्रको ९ अंक रहेको छ ।

समूहको अघिल्लो खेलमा जर्मनीले सान मरिनोलाई ७-०ले हराएको थियो भने चेक गणतन्त्रले नर्वेसँग १-१ को बराबरी खेलेको थियो । नेपाली समयानुसार आज राती १२.३० बजे सुरु हुने यस खेलमा जर्मनीका पहिलो रोजाईका गोलकिपर म्यानुयल नोया र डिफेन्डर जेरोम बोयटाङ चोटका कारण सहभागी हुने छैनन् । त्यस्तै अटार्डस्थित ताकाली राष्ट्रिय रङ्गशालामा समूह ‘एफ’ को खेलमा फिफा वरियतामा १३ औँ स्थानमा रहेको इङल्यान्डले आफूभन्दा १७७ स्थान तल रहेको माल्टाको सामना गर्दै छ ।

माल्टाले समुहका सबै ६ खेल हारेको छ भने इङ्ल्यान्डले ४ जित र २ बराबरीसँगै शिर्षस्थानमा अपराजित छ । खेल आज राती १२.३० बजे नै सुरु हुने छ ।

नेपाली समयअनुसार आज रातीका अन्य खेलहरु

काजाकिस्तानविरुद्ध मोन्टेनेग्रो – ९.४५ बजे

डेनमार्कविरुद्ध पोल्यान्ड – १२.३० बजे

रोमानियाविरुद्ध अर्मेनिया – १२.३० बजे

स्लोभाकियाविरुद्ध स्लोभेनिया – १२.३० बजे

लिदुआनियाविरुद्ध स्कटल्यान्ड – १२.३० बजे,

सान मारिनोविरुद्ध उत्तर आयरल्यान्ड – १२.३० बजे

नर्वेविरुद्ध अजरवैजान – १२.३० बजे