लिभरपुल (एजेन्सी) – इङ्ल्यान्डका २४ वर्षे मिडफिल्डर एलेक्स अक्सलेड-चेम्बर्लेन आर्सनलबाट लिभरपुल प्रस्थान गरेका छन् । डेडलाइन डे चलिरहँदा चेम्बर्लेनलाई चेल्सीले पनि भित्र्याउन खोजिरहेको थियो ।

लिभरपुलले आर्सनलबाट अक्सलेड-चेम्बरलेन ३५ मिलियन पाउन्डमा भित्र्याएको हो । लिभरपुलसँग ५ वर्षको अनुबन्धन गरेका चेम्बर्लेनले त्यहाँ हरेक हप्ता एक लाख बीस हजार पाउन्ड कमाउनेछन् । आर्सनलले प्रस्ताव गरेको एक लाख ८० हजारको तलब अस्वीकार गर्दै उनी लिभरपुलतिर लागेका हुन् । ६ सिजन आर्सनलमा बिताएका चेम्बर्लेनले आर्सनलका लागि ९ गोल गरेका छन् ।

आर्सनल आइतबार लिभरपुलसँग ४-० ले पराजित भएको खेलमा चेम्बर्लेन पनि सहभागी थिए । यसैगरी, आर्सनलका अर्का स्टार खेलाडी एलेक्सिस सान्चेज ल्याउन म्यान्चेस्टर सिटी अझै प्रयासमा छ । म्यान्चेस्टर सिटीले प्रस्ताव गरेको ५० मिलियन पाउन्ड र खेलाडी रहिम स्टेर्लिङ आर्सनलले अस्वीकार गरेको थियो । सान्चेज गुमाएको अवस्थामा आर्सनलले जर्मनीका जुलियन ड्राक्सलर भित्र्याउन कोशिश गर्ने भनिएको छ ।

आर्सनलका अरु दुई छिमेकी टोटनह्याम र चेल्सी पनि स्वान्सी सिटीका फरवार्ड फर्नान्डो लोरेन्टेलाई आ-आफ्नो क्लबमा ल्याउने प्रयासमा छन् । स्वान्सीले म्यान्चेस्टर सिटीका विल्फ्रिड बोनीलाई पुन: किन्ने खबर आएपछि लोरेन्टेलाई अन्य क्लबहरुबाट प्रस्ताव आउन थालेको हो । त्यस्तै स्वान्सीले बायर्न म्युनिखबाट रेनाटो सान्चेसलाई लोनमा अनुबन्ध गरेको छ ।