म्याड्रिड (एजेन्सी)– प्रतिबन्धमा रहेका रोनाल्डोलाई रियल म्याड्रिडको पछिल्लो ला लिगा खेल हेर्न सम्भवत कठिन हुन सक्थ्यो । आइतबार रियलले खेलको अन्त्यतिर गोल फर्काउँदै भ्यालेन्सियासँग २–२ को बराबरी खेलेको थियो ।

तर, रोनाल्डो त्यो खेलमा दर्शकका रुपमा पनि सामेल भएनन् । बरु उनले त्यो समय परिवारलाई दिन उपयुक्त ठाने । अनि परिवारका सदस्यसँगको तस्बिर सार्वजनिक गर्दै सामाजिक सञ्जालमा लेखे ,‘फेमली मुड’ ।टोलीका अन्य साथीहरु १ अंकका लागि संघर्ष गरिरहँदा रोनाल्डो भने परिवारका सदस्य प्रेमिका जिर्योगिना रोड्रिग्वेज, छोरा र केही महिना अघि जन्मेका जुम्ल्याहा छोरी माटेउ र इभा मारिया डोस सान्तोषसँग समय बिताइरहेका थिए ।

३२ वर्षे रोनाल्डोले परिवारका सदस्यसँगको तस्बिर सार्वजनिक गरेको १२ घन्टामै ५२ लाखले लाइक गरेका थिए । त्यसबाट पनि उनको लोकप्रियता थप प्रमाणित हुन्छ । अपरिचित सरोगेट आमाबाट रोनाल्डो केही महिनाअघि जुम्ल्याहा सन्तानका पिता बनेका थिए । अझै उनको परिवार बढ्ने क्रममा रहेको बताइएको छ । रोनाल्डोकी २२ वर्षे प्रेमिका रोड्रिग्वेज गर्भवती रहेको बताइएको छ ।

स्पेनिस सुपर कपमा रेफ्रीलाई धक्का दिएका कारण रोनाल्डो ५ खेलको प्रतिबन्ध छन् । उनको अनुपस्थितिमा जिनेदिन जिदानको साविक विजेता समेत रहेको रियलले आइतबार २ अंक गुमाएको थियो । मार्को एसेन्सियोको २ गोलमा रियलले हार जोगाएको थियो । रोनाल्डो सेप्टेम्बर १७ मा मैदान फर्कदा उनीबाट विगतमा जस्तै समर्थकहरुले गोलको आशा पक्कै गर्नेछन् ।