काठमाडौं(हाम्रो खेलकुद) – नेपाली यूवा टोलीका प्रशिक्षक सुनिल कुमार श्रेष्ठले भारतविरुद्धको फाइनल खेलमा भारतसँग पराजित भएपनि खेलाडीहरुले शतप्रतिशत खेलेको बताएका छन् ।

‘खेलमा जित हार स्वभाविक हुन्छ । हामी हामी अग्रता लिएर पनि हार्न बाध्य बन्यौ ।’ प्रशिक्षक श्रेष्ठले भने, ‘अल एट्याक र अल डिफेन्समा मेरा खेलाडीहरुले राम्रो खेले । तर, नतिजामा सुध्रन सकेन । दोस्रो हाफमा दुई मौका खेर फाल्दा हामीलाई थप प्रेसर भयो ।’ भारतसँगको प्रतिस्पर्धात्मक खेलले नेपाली युथ टिमले अन्य टोलीहरुसँग पनि फाइन खेल्न सक्ने बताए ।

उनले डिफेन्स र फिनिसिङमा केही समस्या रहेकाले अब आउने साफ यू–१६ मा त्यसलाई सुधार गर्दै लैजाने बताए । ‘हामीसँग २० देखि २५ दिनसम्मको समय छ । खेलाडीहरुलाई एक दिन विश्राम दिएर मंगलबारबाट प्रशिक्षण थाल्नेछौं ।’ प्रशिक्षक श्रेष्ठले भने ।

अघिल्लो उमेर समूह भन्दा यो टिम कमजोर हो भन्ने प्रश्नमा प्रशिक्षक श्रेष्ठले यसअघिको उमेर समूहको टिमजस्तै यो टिम पनि राम्रो रहेको प्रतिक्रिया दिए । कुन आधारमा यो उमेर समूहलाई कमजोर भन्ने ? उनले प्रतिप्रश्न गर्दै भने, अघिल्ला उमेर समूहका टिमहरु पनि भारतसँग नै पराजित भएको थियो । यसपटक पनि हामी भारतसँग नै पराजित भयौ । त्यसैले यो टिमलाई कमजोर भन्न नमिल्ने उनले दावी गरे ।

साफ जित्न त्यति सहज छैनः भारतीय प्रशिक्षक विभियानो भारतीय टिमका प्रशिक्षक विभियानो फर्नान्डिजले दक्षिण एसियाली स्तरको उमेर समूहको साफ जितेपनि यो जित्न त्यति सहज नभएको बताएका छन् । ‘हामीले घरेलु भुमिमा नेपाललाई नै पराजित गरेर साफ यु–१५ प्रतियोगिताको उपाधि जित्न सफल भयौ । यो जित्न त्यति सहज छैन ।’ प्रशक्षिक विभियानोले भने, ‘सबै टिम उत्कृष्ट छन् । अरु टिम भन्दा नेपाल झनै उत्कृष्ट टिम हो । उनीहरुलाई पराजित गरेर उपाधि जित्न निकै मुस्किल छ ।

नेपालविरुद्धको खेलबारे प्रतिक्रिया दिदै भारतीय टिमका प्रशिक्षक विभियानोले नेपाललाई खेलमा दवावमा राखेपनि सानो गल्तीमा गोल खाएको र खेलाडीहरुले दोस्रो हाफमा उत्कृष्ट प्रदर्शन गर्दै जित हात पार्न सकेको बताए । उनले अब टिम एएफसी यू–१६ प्रतियोगिताको तयारीमा जुटिहाल्ने बताए ।