काठमाडौं (हाम्रो खेलकुद)– ताजकिस्तानसँग नौ दिनपछि हुने एएफसी एसियन कप छनोटको खेलका लागि स्वदेश फर्केका राष्ट्रिय फुटबल टोलीका गोलकिपर किरण चेम्जोङ आइतबार प्रशिक्षणमा सामेल भएका छन् । शनिबार स्वदेश फर्केको भोली पल्टनै उनी प्रशिक्षणका लागि एन्फा कम्प्लेक्स पुगका हुन् ।

राष्ट्रिय फुटबल टोलीका गोलकिपर किरण चेम्जोङ । फाइल तस्बिर

उनीसहित प्रशिक्षणमा ३० मध्ये २९ खेलाडी पुगेका छन् । अर्का सदस्य रोहित चन्द भने इन्डोनेसियामा नै छन् । जेठको अन्त्यमा यमनसँग घरेलु मैदानमा छनोटको खेलपछि उनी व्यवसायिक फुटबल खेल्न माल्दिभ्स गएका थिए । उनी गत पुसदेखि माल्दिभ्सको माथिल्लो स्तरको टोली टिसी स्पोर्टसमा आबद्ध छन् । किरणको टोली माल्दिभ्सको धिवेही प्रिमियर लिग (डिपिएल) खेलिरहेको छ ।

किरण ताजकिस्तानसँगको खेललाई लिएर उत्साहित छन् । ‘टोली नियमित प्रशिक्षणमा छ । जापान भ्रमणले पनि अझै राम्रो भएको हुनुपर्दछ ’ उनले भने, ‘फेरि हामी घरेलु मैदानमा खेल्ने तयारीमा छौं । विक्रम लामा पनि फर्केकोले टोली पहिला भन्दा पनि अझै बलियो भएको महसुस गरेको छु । जितका लागि मेहनत गर्नेछौं ।’ चैतमा फिलिपिन्ससँगको खेलमा रातो कार्ड पाएका कारण विक्रम यमनसँगको खेलमा प्रतिबन्धमा थिए ।

किरणले घरेलु मैदानमा जस्तो बलियो टोलीसँग खेल्न पनि कठिन नलाग्ने बताए । ‘होम ग्राउन्ड भन्ने वित्तिकै मोरल यसै हाइ हुन्छ ’ यमनसँगको खेलमा म्यान अफ दी म्याच रहेका किरणले थपे, ‘हामीले विगतमा पनि घरेलु टोलीमा उच्च प्रदर्शन गरेका छौं । ताजकिस्तानसँग पनि राम्रो हुन्छ भन्ने विश्वास छ । ’ नेपाल र ताजकिस्तानबी भदौ २० गते हलचोकस्थित नेपाल एपिएफको मैदानमा प्रतिस्पर्धा हुँदैछ ।

छनोटका दुई खेलमध्ये नेपालले पहिलोमा हार र दोस्रोमा बराबरी खेलेको थियो । फिलिपिन्ससँग ४–१ को हार बेहोरेको नेपालले यमनसँग गोलरहित बराबरी खेलेको थियो । फिलिपिन्स ६ अंकसहित शीर्षस्थानमा यमन ४ अंकसहित दोस्रो र तेस्रो स्थानको नेपालको १ अंक तथा ताजकिस्तान अंक विहिन छ ।
किरण ताजकिस्तानसँगको खेलको भोली पल्ट भदौ २१ मै माल्दिभ्स प्रस्थान गर्नेछन् । उनको टोलीले डिपिएलका ४ खेलमा २ मा जित, १ मा बराबरी र अर्कोमा हार बेहोरेको छ । डिपिएलमा ८ टोलीले प्रतिस्पर्धा गरिरहेका छन् ।