लिभरपुल (एजेन्सी) – प्रिमियर लिगमा आज राती लिभरपुल र आर्सनल भिड्दै छन् । अंक तालिकामा ७औँ स्थानमा रहेको लिभरपुलको ४ अंक रहेको छ भने आर्सनल ३ अंकसहित ११औँ स्थानमा रहेको छ ।

आर्सनलका स्टार खेलाडि एलेक्सिस सान्चेज टिममा फर्कने आर्सनलका प्रशिक्षक आर्सन वेंगरले जनाइसकेका छन् । आर्सनलका उपकप्तान लोरेन्ट कोसियल्नि पनि टिममा फर्किँदै छन् । कोसियल्निले पछिल्लो सिजनको अन्तिम खेलमा रातो कार्ड पाएकाले यस सिजनका पहिला दुई खेल गुमाएका थिए ।

लिभरपुलले बिहिबार मात्र होफनहाइमसँग ४-२ को जित निकाल्दै च्याम्पियन्स लिगमा आफ्नो स्थान सुरक्षित गरेको थियो । लिभरपुल आफ्नो स्टार मिडफिल्डर फिलिप कौटिन्हो विना मैदानमा उत्रनेछ । बार्सिलोना जान खोजिरहेका कौटिन्हो बिरामी रहेका प्रशिक्षक जर्जेन क्लपले जनाएका छन् ।

आर्सनलले यस सिजनको पहिलो खेलमा लेस्टरलाई ४-३ ले हराएको थियो भने दोस्रो खेलमा स्टोकसँग १-० को हार बेहोरेको थियो । यसैगरी लिभरपुलले आफ्नो पहिलो खेलमा वाटफोर्डसँग ३-३को बराबरी खेलेको थियो भने दोस्रो खेलमा क्रिस्टल प्यालेसमाथि १-०को जित दर्ता गरेको थियो ।

अघिल्लो सिजन पाचौँ भएको आर्सनलले लिभरपुलसँगको पछिल्लो दुवै खेल गुमाएको छ । खेल आज नेपाली समयअनुसार राती ८.४५ बजेदेखि सुरु हुने छ ।