अलाभा(एजेन्सी)– स्पेनिस ला लिगामा गए राती सुपर स्टार लियोनल मेस्सीले टोलीलाई जित मात्र दिलाएनन् आफ्नो खेल जीवनमा अर्को एउटा खुड्किलो पार गरेका छन् । खेलको पहिलो हाफमा पेनाल्टी चुकाएपनि उनकै २ गोलको मद्दतमा बार्सिलोनाले अल्भेसलाई २–० ले हराएको थियो ।

रियल बेटिससँग सिजनको पहिलो खेलमा मेस्सीको तीन पटकको प्रहार पोलमा लागेर फर्केको थियो । अल्भेसविरुद्ध पहिलो हाफमा उनको पेनाल्टी अल्भेसका गोलकिपर फर्नान्डो पाचेकोले रोकेका थिए । जेरार्ड पिकेलाई विपक्षी खेलाडीले पेनाल्टी बक्समा फाउल गरेपछि बार्सिलोनाले पेनाल्टी पाएको थियो ।

तर, ३० वर्षे मेस्सीले धेरै समय निराश हुनु परेन । सोही खेलमार्फत उनले खेल जीवनमा ३ सय ५० औं गोल पुरा गरेका थिए । ५४ औं मिनेटमा मेस्सीले पहिलो गोल गरेका थिए । जोर्डी अल्बाको क्रसमा मेस्सीले गोलको खाता खोलेका थिए । ६६ औं मिनेटमा मेस्सीले अर्को गोल थपे । पेडराजा र अलेक्सइजले क्लियर गर्न नसकेको बललाई परिवर्तित माको अल्कासेरले हेडमार्फत मिलाइदिएपछि मेस्सीले गोल गरेका थिए ।

ला लिगामा १२ बर्षभन्दा बढी बिताइसकेका मेस्सीले पहिलो गोल १७ वर्षको उमेरमा गरेका थिए । उनीसँग सबैभन्दा निकट रहेका रियल म्याड्रिडका क्रिस्टियानो रोनाल्डो मेस्सीभन्दा ६६ गोल गरे पछाडि छन् । लगातार १४ सिजन खेल्ने क्रम हरेक सिजन कम्तीमा १ गोल गरेका मेस्सी युरोपका शीर्ष ५ लिगमा ३ सय ५० गोल पुरा गर्ने दोस्रो खेलाडी हुन् । यसअघि बायर्न म्युनिखका गर्ड मुलरले आफ्नो खेल जीवनमा बुन्डेस लिगामा ३ सय ६५ गोल गरेका थिए ।

खेल सुरु भएको ५ मिनेटमै २ गोल गरेको एट्लेटिको म्याड्रिडले लास पालसमारलाई ५–१ ले हराएको थियो । एन्जल कोरेया र यानिक कारास्कोको गोलमा एट्लेटिकोले सुरुआती अग्रता लिएको थियो भने जोनाथन कालिरीले ५८ औं मिनेटमा गोल गरेका थिए ।

तर भ्रमणकारी टोलीका लागि कोकेले २ र थोम्सन पार्टेले अर्को गोल गरेपछि एट्लेटिको गोल जित सहज बनेको थियो । गए राती ला लिगाका अन्य खेलमा गिरोनाले मालागालाई १–० ले हरायो भने लेभान्टे र डेर्पोटिभो ला कुरुनाले २–२ को बराबरी खेले ।