बोर्नमाउथ (एजेन्सी) – इङ्लिस प्रिमियर लिगको दाबेदार मध्ये एकका रुपमा हेरिएको म्यानचेस्टर सिटीले आज एफसी बोर्नमाउथमाथि संघर्षपूर्ण जित निकालेको छ । शनिबारको खेलमा रहिम स्टर्लिङले इन्जुरी समयमा गोल गरेपछि सिटीले बोर्नमाउथमाथि २–१ को सघर्षपूर्ण जित निकालेको हो ।

रहिम स्टर्लिङले निर्णायक गोल गरेपछि सिटीका खेलाडी ।

घरेलु मैदान बोर्नमाउथले १३ औं मिनेटमा अग्रता लिएको थियो । बोर्नामाउथका लागि चार्ली ड्यानियल्सले उत्कृष्ट गोल गरेको थियो । डान घोषलिङको चिप क्रसमा चार्लीले सिटीका कप्तान भिसेन्ट कोम्पनीलाई छलाउदै पेनाल्टी इरिया नजिकैबाट राइट ह्याण्ड कर्नरमा गरेको शक्तिशाली प्रहार सिटीका गोलरक्षक एडरसनले रोक्ने कुनै मौका नै पाएनन् ।

त्यसपछि सिटीले लगतार आक्रमण बुनेपछि २१ औं मिनेटमा सफलता मिलेको थियो । सिटीका लागि गाब्रियल जेससले डेभिड सिल्भाको चलाखीपूर्ण पासमा डिफेन्डर नाथान आके र गोलरक्षक बेगोभिचलाई छलाउदै क्लोज रेन्जबाट गोल गर्दै खेललाई १–१ गोलको अवस्थामा पुर्याए । लगत्तै जेससले अर्को गोलको मौका खेर फालेको थियो ।

त्यसपछि दुवै टोलीले गोल गर्ने प्रयास गरेपछि पहिलो हाफमा १–१ गोलको बराबरीमा सकियो । दोस्रो हाफमा पनि सिटीले घरेलु टोलीमाथि दवाव सिर्जना गरेपनि गोल गर्न सकिरहेको थिएन । तर, ९० मिनेटपछिको ७ मिनेट इन्जुरी समयमारहिमले ड्यानिलो लुइज डा सिल्भाको पासमा गोल गर्दै सिटीलाई महत्वपूर्ण तीन अंक दिलाए । खेलको अन्तिमतिर गोलकर्ता रहिम दोहोरो पहेलो कार्ड खादै मैदान बाहिरिए ।

प्रिमियर लिगमा जितसँगै सिटी तीन खेलबाट सात अंक जोड्दै तालिकाको शीर्ष स्थानमा उक्लेको छ । तीन खेलमध्ये सिटीले दुई खेलमा जित हात पार्दा एभर्टनसँग बराबरीमा रोकिएको थियो । घरेलु मैदानमा सिटीसँग पराजित भएको बोर्नमाउथले ३ खेलमा अंक जोड्न सकेको छैन ।