म्यानचेस्टर (एजेन्सी)– म्यानचेस्टर सिटीका फुटबल निर्देशक छिकी बेगरस्ताइनले बार्सिलोनाका लियोन मेस्सी ल्याउने प्रयास निरर्थक हुने बताएका छन् । प्रिमियर लिग टोलीले मेस्सीका लागि ३ सय मिलियन युरो रिलिस क्लज तिरेर पनि भित्राउन सक्ने सञ्चारमाध्यमहरुले जनाएका थिए । तर बेगरस्ताइनले त्यो सम्झौता असम्भव प्राय भएको बताएका छन् ।

सनसँग कुरा गर्दै बेगरस्ताइनल भनेका छन्,‘मेस्सी आउने सम्भावना छैन । उनी सुरक्षाका साथ बार्सिलोनामा रहेका छन् ।’ उनले मोनाकोका युवा स्टार केलियन बाप्पले पनि आउने सम्भावना नरहेको बताएका छन् । बाप्पले पेरिस सेन्ट जर्मेन (पिएसजी) जाने सम्भावना रहेको छ ।

फ्रान्सेली अन्तर्राष्ट्रियलाई सिटीले ल्याउने प्रयास गरेको थियो । क्लबका निर्देशकले अर्को साता सुरुवा बजार बन्द हुनुअघि केही नयाँ खेलाडीसँग सम्झौता हुन सक्ने बताए । ‘हामी बाप्पलेलाई लिने दौडबाट बाहिरिसकेका छौं । अब समयको पावन्दीका कारण सम्भव छैन ’ उनले भने, ‘केही यो थोरै दिनमा केही हुन्छ भने हेरौं । हामी आफ्नो कामका लागि सधै तयार छौं । टोलीको सुधारको आवश्यक देखिने काम हामी गर्छौ ।’

दुई पटकको प्रिमियर लिग च्याम्पियन सिटीले यो सिजन २ सय मिलियन पाउन्ड खर्च गर्दै बेर्नाडो सिल्भा, बेन्जामिन मेन्डी, इडिरसन, डानिल र कायले वाल्करलाई भित्राइसकेको छ । सिटी अझै आर्सनलका स्ट्राइकर एलेक्स सान्चेजलाई ७० मिलियन पाउन्डमा लिने प्रयास गरिरहेको छ ।