म्यानचेस्टर (एजेन्सी)– चोटबाट पूर्ण रुपमा मुक्त भइ नसकेपनि ज्लाटान इब्राहिमोभिचलाई म्यानचेस्टर युनाइटेडका प्रशिक्षक जोसे माउरिन्होले च्याम्पियन्स लिगको टोलीमा समावेश गर्ने भएका छन् । गत सिजन युनाइटेडमा उच्च प्रदर्शन गरेका इब्राहिमोभिचलाई अप्रिलमा घुँडामा चोट लागेको थियो । अहिले पनि उनी चोटमुक्त हुनका लागि मेहनत गरिरहेका छन् ।

बिहीबार मात्र इब्राहिमोभिच एक वर्षको लागि पुनः युनाइटेडसँग अनुबन्धित भएका थिए । इब्राहिमोभिचले जनवरी अघि नै युनाइटेडको जर्सी फेरी लाउने अपेक्षा गरेका छन् । यद्दपी माउरिन्होले भने त्यस्तो अपेक्षा राखेका छैनन् । त्यसका वावजुद ३५ वर्षे स्ट्राइकरलाई माउरिन्होले अर्को साता युरोपियन टोलीमा समेट्ने बताएका छन् ।

‘च्याम्पियन्स लिगको समूह चरणका लागि सायद उनी तयार हुने छैनन् । तर पनि उनी टोलीमा उनको नाम रहनेछ’ माउरिन्होले भने, ‘त्यसका लागि हामीले कुनै खेलाडीलाई हटाउनु पर्ने छैन । तर मलाई लाग्दैन उनी समूह चरण अघि ठिक हुनेछन् ।’

मारिन्होले इब्राहिमोभिचलाई सिजनको दोस्रो भागका लागि अतिरिक्त खेलाडीको रुपमा लिएको बताएका छन् । ‘मैले भनेको दोस्रो भाग समान्यता जनवरी पछि हो । पुनरागमनका लागि उनी एक एक खुड्किला पार गर्दै गइरहेका छन्’ क्लबको तारिफमा उनले थपे, ‘जो युनाइटेडको जर्सीमा क्लबका लागि लड्छ त्यसको खेलाडीका लागि क्लब जहिले पनि अगाडि रहन्छ ।’

इब्राहिमोभिचका लागि विदाई गरेर जाने काम सहज थियो । तर, उनले त्यो बाटो नरोजेकोमा माउरिन्होले उनको तारिफ गरेका छन् । ‘कप जिते । चोट लाग्यो । विदा भएर जानु उनका लागि सजिलो थियो’ उनले भने, ‘तर, उनले त्यो बाटो रोजेनन् । उनीले अर्को सपनालाई पछ्याउन चाहे र फेरि पनि उच्च स्तरमा खेल्न इच्छा राखे ।’

युनाइटेडले च्याम्पियन्स लिगको सेमिफाइनलमा बेनफिका, बासेल र सिएसकेए मस्कोको सामना गर्नेछ । माउरिन्होले समूह सहज नरहेको बताए । ‘हामी त्यस्तो समूहमा छौं । जहाँ जो कोही पनि हार्न वा जित्न सक्छ । सायद हामी अंक बाढ्न सक्छौं’ उनले अगाडि भने, ‘हामी त्यहाँ ४–० वा ५–० नजिता सँगै १३, १४, १६ अंक जोड्न गइरहेका छैनौं । मलाई लाग्छ यो खतरनाक समूह हो । यदि युनाइटेडको पछिल्लो नतिजालाई हेर्ने हो भने बासेलसँग हारेको छ भने दुईपटक सम्म बेनफिकालाई हराउन सकेको छैन ।’

च्याम्पियन्स लिगका अन्य टोलीका बारेमा उनले भने, ‘सिएसकेए मस्कोसँग मलाई लाग्छ गोलरहित वा त्यस्तै । बेनफिकाको आयामसँग पनि म परिचित छु । हामीले केही पटक सिएसकेएसँग खेलेका छौं । त्यस्तै बासेलसँग पनि । मलाई त्यो ठाँउ त्यहाँको वातावरण र उनीहरुको खेल्ने शैली थाहा छ । ’