काठमाडौं (हाम्रो खेलकुद) – राजधानीमा जारी साफ यू–१५ फुटबल च्याम्प्यिनसिपको फाइनल प्रवेशका लागि आज नेपालले बंगलादेशको सामना गर्दैछ । नेपाल र बंगलादेशबीच सातदोबाटोस्थित एन्फा कम्प्लेक्सको क्रितिम मैदानमा दिउँसो ३ः०० बजे प्रतिस्पर्धा सुरु भएको छ । एकै समयमा हलचोकमा जारी अर्को सेमिफाइनलमा भारत र भुटानबीच प्रतिस्पर्धा हुँदैछ ।

बंगलादेशको सामना गर्दा नेपाली युवा टोलीमाथि यसअघिको उमेर समूहको नतिजालाई निरन्तरता दिने चुनौति हुनेछ । उमेर समूहमा नेपाल बंगलादेशसँग पराजित भएको छैन । यसअघि यू १६ का नाममा भएको च्याम्पियनसिपमा तीन पटक भेट्दा पनि नेपाल अपराजित रहेको थियो ।

सन् २०११ मा पहिलो संस्करणमा नेपाल र बंगलादेशले गोलरहित बराबरी खेले । त्यहि संस्करणको तेस्रो स्थानको खेलमा भने नेपालले बंगलादेशमा २–१ ले हराएको थियो । हेमन्त थापा मगरको कप्तानीमा रहेको टोलीले अर्को संस्करणमा फाइनलमा स्थान बनाउन नेपालले बंगलादेशलाई दशरथ रंगशालामा ५–१ पराजित गरेको थियो ।

फेरि एकपटक नेपालले घरेलु मैदानमा बंगलादेशको सामना गर्दै छ । नेपाली टोलीका प्रशिक्षक सुनिल श्रेष्ठले पनि अघिल्ला खेलको कमजोरीलाई सुधार्दै फाइनल यात्रा तय गर्ने आशा व्यक्त गरेका छन् । माल्दिभ्ससँगको खेलमा रातो कार्ड पाएका रोशन दोङ भारतको खेलमा प्रतिबन्धमा थिए । बंगलादेशको खेलमा उनी फर्कने भएपछि नेपालको रक्षापक्ति बलियो हुने अपेक्षा गरिएको छ ।

साविक विजेताको हैसियतमा नेपाल आएको बंगलादेशलाई हराउन त्यहि सहज भने छैन । समूह चरणका दुई खेलमा बंगलादेशले ७ गोल गरिसकेको छ । श्रीलंकालाई ४–० र बंगलादेशलाई भुटानलाई ३–० ले हराउँदै बंगलादेश समुह ‘ए’ को विजेता बनेको थियो । पहिलो खेलमा माल्दिभ्सलाई ६–० ले हराएको नेपाल अर्को खेलमा भारतसँग २–१ ले पराजित भएपछि समूह ‘बी’ को उपविजेता बनेको थियो ।