काठमाडौं (हाम्रो खेलकुद) – साफ यू–१५ फुटबल च्याम्प्यिनसिपका दुवै सेमिफाइल आज एकै समयमा हुँदैछ । नेपाल र बंगलादेशबीच सातदोबाटोस्थित एन्फा कम्प्लेक्सको क्रृतिम मैदानमा प्रतिस्पर्धा हुँदा हलचोकस्थित हलचोकमा नेपाल एपिएफको मैदानमा भारतले भुटानको सामना गर्नेछ ।

बंगलादेशको सामना गर्दा नेपाली युवा टोलीमाथि यसअघिको उमेर समूहको नतिजालाई निरन्तरता दिनु हुनेछ । यसअघि यू १६ का नाममा भएको च्याम्पियनसिपमा तीन पटक भेट्दा पनि नेपाल पराजित भएको छैन । सन् २०११ मा पहिलो संस्करणमा नेपाल र बंगलादेशले गोलरहित बराबरी खेले ।

त्यहि संस्करणको तेस्रो स्थानको खेलमा भने नेपालले बंगलादेशमा २–१ ले हराएको थियो । हेमन्त थापा मगरको कप्तानीमा रहेको टोलीले अर्को संस्करणमा फाइनलमा स्थान बनाउन नेपालले बंगलादेशलाई दशरथ रंगशालामा ५–१ पराजित गरेको थियो । फेरि एकपटक नेपालले घरेलु मैदानमा बंगलादेशको सामना गर्दै छ ।

साविक विजेताको हैसियतमा नेपाल आएको बंगलादेशलाई हराउन त्यहि सहज भने छैन । समूह चरणका दुई खेलमा बंगलादेशले ७ गोल गरिसकेको छ । श्रीलंकालाई ४–० र बंगलादेशलाई भुटानलाई ३–० ले हराउँदै बंगलादेश समुह ‘ए’ को विजेता बनेको थियो ।

पहिलो खेलमा माल्दिभ्सलाई ६–० ले हराएको नेपाल अर्को खेलमा भारतसँग २–१ ले पराजित भएपछि समूह ‘बी’ को उपविजेता बनेको थियो ।
माल्दिभ्ससँगको खेलमा रातो कार्ड पाएका रोशन दोङ भारतको खेलमा प्रतिबन्धमा थिए । बंगलादेशको खेलमा उनी फर्कने भएपछि नेपालको रक्षापक्ति बलियो हुने अपेक्षा गरिएको छ ।

भारत र भुटान भिड्दै
हलचोकमा भारत र भुटानबीच प्रतिस्पर्धा हुनेछ । भारत प्रतियोगिताको दाबेदार मध्ये एकका रुपमा हेरिएको छ । भारत र बंगलादेश प्रतियोगिताका अपराजित टोली हुन् । माल्दिभ्सलाई ९–० र नेपाललाई २–१ ले हराएपछि भारत समूह ‘बी’ को विजेता बनेको थियो ।

श्रीलंकालाई पहिलो खेलमा ६–० ले हराएको भुटान अर्को खेलमा बंगलादेशसँग ३–० ले पराजित भएको थियो, जसका कारण टोली समूह ‘ए’ को उपविजेता मात्र बनेको थियो । २०१३ मा भएको पहिलो संस्करणमा भाग लिएको भुटान त्यति बेला समूह चरणमा अन्तिम भएको थियो । २०१५ मा भने भुटानले भाग लिएन ।