म्याड्रिड (एजेन्सी) – रियल म्याड्रिडका प्रशिक्षक जिनेदिन जिदानले आज हेने खेलमा प्रतिबन्धमा रहेका क्रिस्टियानो रोनाल्डोलाई पुरा समय खेलाइने बताएका छन् ।

रियलको घरेलु मैदानमा हरेक बर्ष हुने सेन्टिएगो बर्नबउ ट्रफी मैत्रीपूर्ण खेलमा यसपाली रियलले इटालियन टोली फियोरेन्टिनाको सामना गर्दैछ । खेल नेपाली समयानुसार राती २ः३० बजे सुरु हुनेछ ।

बार्सिलोनासँग स्पेनिस सुपर कपको पहिलो लेगमा रातो कार्ड पाएपछि रेफ्रीलाई धकलेका रोनाल्डो हाल ५ खेलको प्रतिबन्धमा छन् । मैत्रीपूर्ण खेल भएका कारण खेल्न पाउने रोनाल्डोलाई खेलको पुरै अबधि खेलाउने प्रशिक्षक जिदानले बताएका छन् । त्यो खेलले रोनाल्डोको फिटनेसमा मद्दत पुग्ने उनको विश्वास छ ।

मैत्रीपूर्ण खेल भएपनि रियलका पूर्व अध्यक्ष सेन्टिएगो बर्नबउको स्मरणमा हुने खेल भएकाले जिदानले त्यसलाई महत्वका साथ हेरेका छन् । ‘ समर्थकहरुलाई यो खेलको महत्वपूर्ण अर्थ छ । त्यसैले हामी राम्रो खेलेर ट्रफीलाई घरमै राख्ने प्रयास गर्नेछौं,’ जिदानले भने, यो खेलमार्फत खेलाडीलेको फिटनेसमा पनि फाइदा पुग्नेछ । रोनाल्डो पुरै ९० मिनेट खेल्नेछन् ।’

सन् १९७९ देखि आयोजनामा आएको सेन्टिएगो बेर्नबउ ट्रफी रियलले २६ पटक जितेको छ । अघिल्लो सिजन फ्रान्सको दोस्रो डिभिजनको रेइम्सलाई ५–३ ले हराउदै रियलले उपाधि घरमै राखेको थियो ।