काठमाडौं (हाम्रो खेलकुद)– नेपाली युवा टोलीका प्रशिक्षक सुनिल श्रेष्ठले साफ यू १५ फुटबल च्याम्पियनसिसपमा भारतविरुद्ध रणनीति अनुरुप नतिजा निकाल्न नसकेको बताएका छन् । भारतसँग २–१ ले पराजित हुँदै समूहको उपविजेतामा चित्त बुझाउनु परेपछि प्रशिक्षक श्रेष्ठले खेलमा सुधार गर्न आवश्यक रहेको बताएका छन् ।

‘मेहेनत गर्दा गर्दै पनि नतिजा निकाल्न सकिएन । पहिलो खेलमा रातो कार्ड पाउँदै रोशन दोगंले खल्न नपाएका कारण पनि रक्षापक्तिमा तामेल देखिएन,’ उनले भने, ‘ तर अर्को खेलमा उनी फर्कछन्, त्यो खेलमा प्रदर्शनमा सुधार गर्नेछौं ।’ नेपालले शुक्रबार बंगलादेशसँग सेमिफाइनल खेल्नेछ । अर्को सेमिफाइतल भारत र भुटानबीच हुनेछ ।

प्रशिक्षक श्रेष्ठले भारतविरुद्ध बुनेको रणनीतिले नतिजा नदिएको स्वीकारे । ‘भारतको खेल समिक्षा गरेपछि हामीले एयर बल भन्दा सर्ट पासमा ध्यान दिने रणनीति बनाएका थियौं । सर्ट पाससँगै थर्ड म्यान रनिङको तरिका प्रयोग गर्ने प्रयास गरेपनि सफल भएनौ, उनले भने, ‘ भारतको खेल हेरेर सेट पिसमा रोक्ने प्रयास गरेको थियौं । कतिमा सफल पनि भयौं । तर पूर्ण रुपमा भने सफल हुन सकेनौं । ’

माल्दिभ्ससँगको खेलमा भएका गल्ति भारतविरुद्धको खेलमा सुधार गरेको श्रेष्ठको भनाई थियो । उनले अर्को खेलमा अझै सुधार गर्ने विश्वास व्यक्त गरे । ‘ बंगलादेश समूह विजेता भएकाले सेमिफाइनल टफ हुनेछ,’ उनले भने, आजकै फर्मेसनमा खेलेर नतिजा निकाल्ने प्रयास गर्नेछौं । सेमिफाइनलमा अझै प्रदर्शनमा निखार आउनेछ ।’