काठमाडौं (हाम्रो खेलकुद)– भारतीय युवा टोलीका प्रशिक्षक बिबिआनो फर्नान्डेजले साफ यू १५ फुटबल च्याम्पियनसिपको फाइनलमा नेपालसँगै खेल्ने आशा गरेका छन् । 

समूह ‘बी’ को अन्तिम खेलमा घरेलु टोली नेपाललाई २–१ हराएपछि प्रशिक्षक फर्नान्डेजले पोस्ट म्याच कन्फ्रेन्समा भने, ‘घरेलु टोलीले भएकाले नेपालले राम्रो खेल्ने आशा गरेको छु । हामी पुनः नेपालसँग फाइनल खेल्न चाहन्छौं ।’

बुधबारको नतिजापछि पहिले नै सेमिफाइनल पुगिसकेका दुई टोलीमध्ये भारत समूह विजेता र नेपाल उपविजेता बनेका छन् । शुक्रबार एकै समयमा हुने सेमिफाइनलमा नेपालले बंगलादेश र भारतले भुटानको सामना गर्नेछ ।

भारतलाई प्रतियोगितामा बढी उमेरको खेलाडी सहभागी गराएको भन्ने आरोपको खण्डन गर्दै प्रशिक्षकले भारत ग्रासरुट तहमा गम्भीर रहेको बताए । ‘ भारतले उमेर समूहका खेलाडीको विकासमा प्रयास गर्दै आएको छ । हामीसँग हरेक राज्यमा सक्रिय स्काउटहरु छन् । भारतले युवा फुटबलमा गम्भीरतापूर्वक ध्यान दिएरहेको छ,’ उनले भने, ‘ भारतलाई प्रश्न गर्नुअघि आफ्नु टोलीको तयारी कस्तो भएको थियो भनेर समिक्षा गर्न जरुरी छ ।’

माल्दिभ्स र बंगलादेशका प्रशिक्षकले भारतले बढी उमेरका खेलाडी खेलाएको हुन सक्ने आशंका गरेका थिए । अर्को प्रसंगमा घरेलु समर्थकले महत्वपूर्ण भूमिका निर्वाह गरेको बताए । उनले भने ‘घरेलु समर्थकले खेलाडीलाई अघि बढ्न धेरै मद्दत गर्दछन् । आजको जस्तो मैदानमा नजिकबाट खेल नियाल्दै दर्शकले खेलाडीको हौसला बढाइरहेका थिए ।’