काठमाडौं (हाम्रो खेलकुद)– नेपाल र बंगलादेशबीच साफ यू १५ फुटबल च्याम्प्यिनसिपको सेमिफाइनल सातदोबाटोस्थित एन्फा कम्प्लेक्सको क्रृतिम मैदानमा हुनेछ । सेमिफाइनल शुक्रबार दिउँसो ३ः०० बजे सुरु हुने अखिल नेपाल फुटबल संघ (एन्फा) ले जनाएको छ ।

अर्को सेमिफाइनल भारत र भुटानबीच सोही समयमा हुनेछ ।  त्यो खेल हलचोकस्थित शसस्त्र प्रहरी बलको मुख्यालयको मैदानमा हुनेछ ।समूह ‘बी’ को अन्तिम खेलमा बुधबार नेपाल भारतसँग २–१ ले पराजित भएपछि सेमिफाइनल समिकरण पुरा भएको थियो ।

नेपाल समूहको उपविजेता र भारत विजेता बनेको थियो । त्यसअघि नेपालले ६–० र भारतले ९–० ले हराएको माल्दिभ्स प्रतियोगिताबाट बाहिरिसकेको थियो ।

नेपाल र भारत भने पहिलो जितबाट प्रतियोगिताको अन्तिम चारमा पुगेका थिए । बुधबारको नतिजापछि नेपालले समूह ‘ए’ को विजेता बंगलादेशलाई सेमिफाइनलको प्रतिद्वन्द्वि पाएको हो । समूह विजेता बनेको भारतले अर्को समूहको उपविजेता भुटानसँग खेल्ने तय भएको हो ।

उमेर समूहमा भारतलाई हराउन नेपाल फेरि एकपटक असफल भएको छ । यसअघि यू १६ का नाममा तीन संस्करण हुँदा सबैमा नेपाल भारतसँग नै पराजित भएको थियो । सन् २०११ मा नेपालमा आयोजित साफ यू १६ को पहिलो संस्करणमा नेपाल हेमन गुरुङको कप्तानीमा रहेको थियो ।

दशरथ रंगशालामा भएको च्याम्पियनसिपको सेमिफाइनलमा नेपाल भारतसँग पराजित भएको थियो । निर्धारित र थप समयमा १–१ को बराबरीमा भएपछि पेनाल्टीमा नेपाली टोली ४–२ ले पराजित भएको थियो ।

दोस्रो संस्करणमा हेमन्त थापा मगरको कप्तानीको टोलीलाई भारतले फाइनलमा १–० ले हराएको थियो । बंगलादेशमा भएको अघिल्लो संस्करणमा पनि नेपाल भारतबाट सेमिफाइनलमा रोकिएको थियो । जहाँ नेपाल १–० पराजित भएको थियो ।