दिपेन्द्र पोखरेल
काठमाडौं (हाम्रो खेलकुद)– नेपाल र भारतबीच साफ यू १५ साफ च्याम्पियनसिप अन्तर्गत समूह चरणको अन्तिम खेलको पहिलो हाफ १–१ को बराबरीमा टुंगिएको छ । एन्फा कम्प्लेक्सस्थित क्रृतिम मैदानमा जारी खेलमा प्रतियोगिताको बलियो दाबेदार भारतले अग्रता बनाएपनि त्यसलाई जोगाउन भने सकेन ।

२७ औं मिनेटमा गोल कप्तान विक्रमप्रताप सिंहले गोल गर्दै भारतलाई अग्रता दिलाएका थिए । विके ओरामको प्रहार नेपाली गोलकिपरले रोकेपनि पूर्ण नियन्त्रणमा राख्न नसक्दा वित्रम हेडमार्फत गोल गरेका थिए । ४१ औं मिनेटमा नेपाली युवा टोलीले गोल फर्काएको थियो । कप्तान रोशन रानामगरले नेपालका लागि बराबरी गोल गरेका थिए ।

आकाश बुढामगरलाई भारतीय खेलाडी मोइरंगथेम थोइबा सिंहले पेनाल्टी बक्समा लडाएपछि नेपालले पेनाल्टी पाएको थियो । रोशनले पेनाल्टी हानेको बल भारतीय गोलकिपरले रोकेपनि रिबाउन्डमा रोशनले गोल गर्दै खेललाई १–१ को बराबरीमा पुर्याएका थिए ।

खेलको सुरुआतमा केही मिनेट नेपालले नियन्त्रण बनाएपछि विस्तार भारतीय टोली लयमा आएको थियो । भारतका मोइरंगथेमले चौथो मिनेटमा गरेको प्रहार र ३९ औं मिनेटमा लाल रोकिमाले गरेको प्रहार क्रसबारमा लागेर फर्केको थियो ।

दुवै सेमिफाइनल पुगिसकेकाले त्यो नतिजाले सेमिफाइनल कोसँग खेल्ने भन्ने मात्र अर्थ राख्दछ । समूह ‘बी’ मा रहेको अर्को टोली माल्दिभ्सलाई हराइसकेका दुवै टोली अन्तिम चारमा पुगिसकेका छन् । आजको खेलको नतिजाले विजेता र उपविजेताको छिनोफानो गर्नेछ ।

नेपालले माल्दिभ्सलाई ६–० ले हराउँनुअघि त्यहि टोलीलाई भारतले ९–० ले हराएर प्रतियोगितामा एक चरण अघि बढिसकेका थिए । आजको नतिजापछि समूहको विजेता बन्ने सेमिफाइनलमा भुटानको र उपविजेताले बंगलादेशको सामना गर्नेछ ।