ललितपुर (हाम्रो खेलकुद)– राजधानीमा जारी साफ यू १५ फुटबल च्याम्पियनसिपमा नेपालले प्रतियोगिताको सबैभन्दा बलियो दाबेदार भारतको आज सामना गर्दैछ । खेल सातदाबोटोस्थित एन्फा कम्प्लेक्सको क्रृतिम मैदानमा ३ः०० बजे सुरु हुनेछ ।

भारतविरुद्ध समूह चरणको अन्तिम खेलअघि वामअर्प गर्दै नेपाली युवा टोलीका खेलाडी । तस्बिर- बिबेक सुबेदी

तर, दुवै सेमिफाइनल पुगिसकेकाले त्यो नतिजाले सेमिफाइनल कोसँग खेल्ने भन्ने मात्र अर्थ राख्दछ । समूह ‘बी’ मा रहेको अर्को टोली माल्दिभ्सलाई हराइसकेका दुवै टोली अन्तिम चारमा पुगिसकेका छन् । आजको खेलको नतिजाले विजेता र उपविजेताको छिनोफानो गर्नेछ । नेपालले माल्दिभ्सलाई ६–० ले हराउँनुअघि त्यहि टोलीलाई भारतले ९–० ले हराएर प्रतियोगितामा एक चरण अघि बढिसकेका थिए ।

फुटबलमा नेपालका लागि दक्षिण एसियाली राष्ट्रमध्ये भारत सबैभन्दा बलियो प्रतिद्वन्द्वि रहँदै आएको छ । नेपाली राष्ट्रिय टोलीले भारतीय टोलीलाई पटक पटक हराएपनि उमेर त्यो सफलता प्राप्त गर्न सकिएको छैन ।यसअघि यू १६ उमेर समूहमा हुने साफ फुटबल च्याम्पियनसिप यसपटक यू १५ समूहमा खेलाइएको छ । यू १६ अघिल्ला तीनै संस्करणमा नेपाल भारतीय टोलीसँग पराजित भएको थियो ।

यसपटक अहिले सम्मको हारको बदला लिने मौका फेरि एक पटक नेपाली युवा टोलीले पाएको छ । सन् २०११ मा नेपालमा आयोजित साफ यू १६ को पहिलो संस्करणमा नेपाल हेमन गुरुङको कप्तानीमा रहेको थियो । दशरथ रंगशालामा भएको च्याम्पियनसिपको सेमिफाइनलमा नेपाल भारतसँग पराजित भएको थियो । निर्धारित र थप समयमा १–१ को बराबरीमा भएपछि पेनाल्टीमा नेपाली टोली ४–२ ले पराजित भएको थियो ।

दोस्रो संस्करणमा हेमन्त थापा मगरको कप्तानीको टोलीलाई भारतले फाइनलमा १–० ले हराएको थियो । बंगलादेशमा भएको अघिल्लो संस्करणमा पनि नेपाल भारतबाट रोकिएको थियो । जहाँ नेपाल १–० पराजित भएको थियो ।सेमिफाइनलमा समूह विजेताले भुटानको र उपविजेताले बंगलादेशको सामना गर्नेछ ।