काठमाडौं (हाम्रो खेलकुद)– फुटबलमा नेपालका लागि दक्षिण एसियाली राष्ट्रमध्ये भारत सबैभन्दा बलियो प्रतिद्वन्द्वि रहँदै आएको छ । नेपाली राष्ट्रिय टोलीले भारतीय टोलीलाई पटक पटक हराएपनि उमेर त्यो सफलता प्राप्त गर्न सकिएको छैन । 

यसअघि यू १६ उमेर समूहमा हुने साफ फुटबल च्याम्पियनसिप यसपटक यू १५ समूहमा खेलाइएको छ । यू १६ अघिल्ला तीनै संस्करणमा नेपाल भारतीय टोलीसँग पराजित भएको थियो ।

यसपटक अहिले सम्मको हारको बदला लिने मौका फेरि एक पटक नेपाली युवा टोलीले पाएको छ । समूह ‘बी’ को समूह चरणको अन्तिम खेलमा आज नेपालले भारतको सामना गर्दैछ । सातदोबाटोस्थित एन्फा कम्प्लेक्सको क्रृतिम मैदानमा दिउँसो ३ बजे खेल सुरु हुनेछ ।

सन् २०११ मा नेपालमा आयोजित साफ यू १६ को पहिलो संस्करणमा नेपाल हेमन गुरुङको कप्तानीमा रहेको थियो । दशरथ रंगशालामा भएको च्याम्पियनसिपको सेमिफाइनलमा नेपाल भारतसँग पराजित भएको थियो । निर्धारित र थप समयमा १–१ को बराबरीमा भएपछि पेनाल्टीमा नेपाली टोली ४–२ ले पराजित भएको थियो ।

दोस्रो संस्करणमा हेमन्त थापा मगरको कप्तानीको टोलीलाई भारतले फाइनलमा १–० ले हराएको थियो । बंगलादेशमा भएको अघिल्लो संस्करणमा पनि नेपाल भारतबाट रोकिएको थियो । जहाँ नेपाल १–० पराजित भएको थियो ।

यसपटक पनि बलियो दाबेदारी प्रस्तुत गर्ने क्रममा भारतले पहिलो खेलमा माल्दिभ्सलाई ९–० ले पराजित गरेको थियो । माल्दिभ्सलाई ६–० ले हराउँदै नेपालले पनि भारतसँग खेल्नुअघि नै सेमिफाइनलमा स्थान सुरक्षित गरिसकेको छ । एकै टोलीलाई हराएका मध्ये गोलअन्तरमा भारत शीर्ष र नेपाल दोस्रो स्थानमा छ ।

सेमिफाइनलमा समूह विजेताले भुटानको र उपविजेताले बंगलादेशको सामना गर्नेछ । पहिलो खेलमा भारतका लागि रभी बहादुर रानाले ह्याट्रिक गरेका थिए । नेपालका लागि भने पहिलो खेलमा रोशन दोगंले रातो कार्डको सामना गरेका कारण भारतविरुछ खेल्ने छैनन् ।