दिपेन्द्र पोखरेल

ललितपुर – बंगलादेश राजधानीमा जारी साफ यू १५ फुटबल च्याम्पियनसिपअन्तर्गत समूह ‘ए’ को समूह विजेता बनेको छ । सातदोबाटोस्थित एन्फा कम्प्लेक्समा रहेको क्रृतिम मैदानमा भुटानलाई ३–० ले हराउँदै बंगलादेश समूह विजेता बनेको हो ।

भुटानविरुद्ध गोल गरेपछि बंगलादेशका मोहम्मद मिराज मोला (दायाँ) । तस्बिर- बिबेक सुबेदी

भुटान पनि यसअघि नै अन्तिम चारमा पुगिसकेको छ । अब बंगलादेशले समूह ‘बी’ को उपविजेता (नेपाल र भारत मध्ये एक) सँग फाइनल प्रवेशका लागि प्रतिस्पर्धा गर्नेछ । भुटानविरुद्ध पहिलो हाफमा १–० अग्रता बनाएको बंगलादेशले दोस्रो हाफमा दुई गोल थपेको थियो ।

दोस्रो हाफका दुवै गोल मोहम्मद मिराज मोलाले गरेका थिए । पहिलो गोल भने २५ औं मिनेटमा मोहम्मद फोयसल अहमद फिहिमले गरेका थिए । उनले सिक्स यार्ड बक्सबाट गोल गरेका हुन् । त्यसअघि अग्रता लिने मौका बंगलादेशले गुमाएको थियो । पहिलो हाफको इन्जुरी समयमा पनि बंगलादेशले थप गोलको प्रयास गर्यो तर बल बारमा लागेर फर्कियो।

५२ औं मिनेटमा मिराजले टोलीका लागि दोस्रो गोल गरेका थिए । मोहम्मद मिनहाजुल करिम सदिनको क्रसमा मिराजले गोल गरेका हुन् । खेल सकिन ८ मिनेट बाँकी रहँदा मिराजले अर्को गोल थप्दै टोलीको जितलाई थप सहज बनाए । च्याम्पियनसिपमा भोली आयोजक नेपाल र भारतबीच समूह ‘बी’ को विजेताका लागि प्रतिस्पर्धा हुनेछ । ‘बी’ को विजेताले अन्तिम दुई प्रवेशका लागि भुटानको सामना गर्नेछ ।