म्यानचेस्टर (एजेन्सी) – म्यानचेस्टर युनाइटेडका पूर्व स्टार वायन रुनीले इङ्लिस प्रिमियर लिगमा २ सय गोल पुरा गरेका छन् । १३ वर्षपछि यो सिजन युनाइटेडबाट पुरानै क्लब एभर्टन फर्केका रुनीले प्रिमियर लिगमा गएराती म्यानचेस्टर सिटीविरुद्धको खेलमा गोल गर्दै २ सय गोलको कोसेढुंगा पुरा गरेका हुन् ।

प्रिमियर लिगमा २ सय गोल गर्ने उनी दोस्रो खेलाडी हुन् । प्रिमियर लिगमा सबैभन्दा बढी गोल गर्ने खेलाडी एलन शियरर हुन् । उनले नाममा २ सय ६० गोल छ । एभर्टनको अवे खेलमा रुनीको गोलमा अग्रता लिएपनि खेल १–१ को बराबरीमा टुंगिएको थियो । रहिम स्टर्लिङले खेलको अन्त्यतिर गोल गर्दै सिटीलाई हारबाट जोगाएका थिए ।

पछिल्लो समयमा फर्ममा नभएको भन्दै आलोचना भैरहेको बेला रुनीले नयाँ सिजनको सुरुआत दमदार रुपमा गरेका छन् । उनकै गोलमा एभर्टनले लिगको पहिलो खेल जितेको थियो । लगातार दुई खेलमा गोल गरेका रुनीले इङ्ल्यान्डको राष्ट्रिय टोलीमा पुनरागमन गर्न सक्ने अनुमान गरिएको छ । रुनीको खेल हेर्न इङ्ल्यान्डका प्रशिक्षक ग्यारेथ साउथगेट म्याचेस्टर पुगेका थिए ।

लगातार गोल गरेपछि रुनीले आफु प्रदर्शनमा केन्द्रित रहेको बताएका छन् । ‘मेरो टिम प्रशिक्षक ग्यारेथ साउथगेटसँग पछिल्लो समय लगातार सम्पर्क भैरहेको छ ,’ रुनीले भने, ‘हेरौ भविष्यमा के हुन्छ ।’ विश्वकप छनोट अन्र्तगत इङ्ल्यान्डले यो महिला माल्टा र स्लोभाकियाविरुद्ध खेल्ने तय छ ।