म्यानचेस्टर (एजेन्सी)– इङ्लिस प्रिमियर लिगमा आज राती एउटा खेल हुँदैछ । जसमा म्यानचेस्टर सिटी र एभर्टन भिड्दै छन् । अघिल्लो सिजन एभर्टनसँग ४–० को हार बेहोरेको पेप गोर्डिओलाको टोली आज बदला लिने सुरमा मैदानमा उत्रिने छ । खेल नेपाली समय अनुसार रातको १२ः४५ बजे सुरु हुने छ ।

सिजनको पहिलो खेलमा नव प्रवेशी टोली ब्राइटनलाई २–० ले हराएको सिटीले आज घरेलु मैदानमा एभर्टनविरुज्ञ उत्रने तयारीमा छ । पछिल्ला ८ अवे खेलमा जित निकाल्न नसकेको एभर्टनको चुनौति लिगका ५ खेलमा अपराजित रहेको सिटीले सहजै पछ्याउने अनुमान गरिएको छ ।

सिटीका इकेली गुन्डोगान ८ महिना पछि चोटमुक्त भएर फर्किसकेका छन्, तर आजको खेलमा सुरुआत गर्नेमा शंका छ । इलारा मेन्डी र फावियन डेल्फ अझै पनि चोटग्रस्त नै छन् । अघिल्लो खेलमा तीन मिडफिल्ड लोरिक साने, रहिम स्टर्लिङ र बर्नार्डो सिल्भालाई बेन्चमै राखेको सिटीले आज उनीहरुलाई मौका दिने सम्भावना छ ।

पहिलो खेलमा स्टोकलाई १–० ले हराएको भ्रमणकारी टोलीलाई अझै पनि खेलाडीको चोटले पिरोलिरहेको छ । रोस बार्कली, कोलम्यान, फ्युनेस मोरी, बोलासी र स्यान्ड्रो रामिरेज जस्ता स्टारहरु अझै फिट भइसकेका छैनन् । क्लब कीर्तिमानी रकममा यसै साता स्वान्सीबाट भित्रिएका सिगुर्डसनले आज सुरुआत गर्ने प्रवल सम्भावना छ । पहिलो खेलमा एकमात्र गोल गरेका वायन रुनीले आजको खेलमा पनि अग्रपक्तिको मोर्चा सम्भावना छ ।