डिपोर्टिभो (एजेन्सी)– रियल म्याड्रिडले जितका साथ स्पेनिस ला लिगा उपाधि रक्षाको यात्रा सुरु गरेको छ । आलोचकहरुलाई जवाफ दिने क्रममा गेराथ बेलले टोलीका सिजनको पहिलो गोल गरेपछि रियलले गए राती डिपोर्टिभा लाकुरुनालाई ३–० ले हराएको थियो ।

१० खेलाडीमा सिमित हुँदै रियलले खेलको अन्त्य गर्नुअघि सअ कासिमेरो र टोनी क्रुसले गोल गरेका थिए । चोटका कारण अघिल्लो सिजन कमै मात्र खेलेका बेलमाथि उच्च प्रदर्शन गर्नुपर्ने दबाब थियो । उनको नियमित स्थान टोलीमा रहने नरहनेमा पनि शंका थियो ।

प्रि सिजनमा पनि उनले गोल गर्न सकेका थिएनन् । मार्को एसेन्सीले धेरैको ध्यान तानेका थिए र बेल बेन्च मै सिमित हुनु पर्ने अनुमान पनि गरिएको थियो । तर, बेलले सुरुआत मात्र गरेनन् टोलीलाई गोलको खाता पनि खुलाए ।

 सुरुआतमा रियल भन्दा डिपोर्टिभा बलियो देखिएको थियो । फ्लोरिन एन्डोन दुईपटक सम्म गोलको नजिक पुगेका थिए । तर, उनी सफल भएनन् । उल्टो बेलले २० औं मिनेटमा रियललाई अग्रता दिलाए । फेब्रुअरी यता ३ सय ९२ मिनेट बेल गोल गर्नबाट असफल भएका थिए ।

खेलमा विस्तारै रियलले पकड बनाउँदै लगेपछि २७ औं मिनेटमा कासिमेरोले गोल गरेका थिए । मार्सेलोको क्रममा कासिमेरोले सिक्स यार्ड बक्सबाट गोल गरेका थिए । पछिल्ला पाँच खेलमा कासिमेरोको त्यो तेस्रो गोल हो । ६२ औं मिनेटमा क्रुसले गोल गर्दै जितलाई थप सहज बनाएका थिए ।

प्रतिबन्धका कारण क्रिस्टियानो रोनाल्डो विना उत्रदा पनि रियलले सहज जित हासिल गरेको छ । सुपर कपको दोस्रो लेगयता रोनाल्डो पाँच खेलको प्रतिबन्धमा छन् । सुपर कपको पहिलो लेगमा उनी दोहोरो पहेलो कार्ड पाउँदै मैदान बाहिरिनु परेको थियो । त्यसपछि उनीमाथि पाँच खेलको प्रतिबन्ध लगाइएको थियो ।

गए रातीको खेलको इन्जुरी समयको पहिलो मिनेटमा सर्जियो रामोस पनि दोस्रो पहेलो कार्ड पाउँदै मैदान बाहिरिएका थिए । त्यसअघि ८९ औं मिनेटमा डिपोर्टिभोका एन्डोन पेनाल्टीमा गोल गर्न असफल भएका थिए ।