म्याड्रिड(एजेन्सी) – शनिबारबाट शुरु भएको स्पेनिस ला लिगा फुटबलको नयाँ सिजनको पहिलो खेलमा एट्लेटिको म्याड्रिड बराबरीमा रोकिएको छ । ला लिगा अन्र्तगत शनिबार राति भएको खेलमा आफ्नो मुख्य खेलाडीले रातो कार्ड पाएको खेलमा एट्लेटिको म्याड्रिड ला लिगाको नव प्रवेशी क्लब जिरोनासँग २–२ गोलको बराबरीमा रोकिएको हो ।

एट्लेटिको म्याड्रिडले दुई गोलले पछि परेको स्थिति उल्ट्याउदै सम्भावित हार टारेको हो । एट्लेटिको म्याड्रिड शुरुवाती २५ मिनेट भित्र नै दुई गोलले पछि परेको थियो । २२ औं मिनेटमा क्रिष्टियन स्टुआनीले गोल गर्दै घरेलु टोलीलाई अग्रता दिलाएका थिए । त्यसको तीन मिनेटपछि स्टुआनीले नै गोल गर्दै जिरोनालाई २–० को स्थितिमा पुर्याएका थिए । पहिलो हाफमा २–० ले पछि परेको एट्ल्टिको म्याड्रिड ६७ औं मिनेटमा १० खेलाडीमा सीमित बन्दा हार्ने निश्चित देखिएको थियो ।

म्याड्रिडका फ्रेन्च फरवार्ड एन्टेनियो ग्रिजम्यानले ६६ औं मिनेटमा अनावश्यक डाइभिङ गरेको भन्दै रेफ्री जुवान मार्टिनेजले पहेंलो कार्ड देखाएका थिए । त्यसको प्रतिवाद गरेको भन्दै रेफ्री मार्टिनेजले ग्रिजम्यानलाई अर्काे पहेंलो कार्ड देखाउदै मैदान बाहिर पठाएका थिए । तर, एट्लेटिको म्याड्रिडले १० खेलाडी भएको कुनै महसुस हुन नदिई खेलमा उत्कृष्ट पुनरागमन गर्दै दुई गोल गरेर सम्भावित हारलाई टारेका थिए ।

एट्लेटिकोका लागि ७३ औं मिनेटमा एन्जल कोरेराले गोल गर्दै गोल अन्तर २–१ मा झारेका थिए । ८५ औं मिनेटमा होजे मारिया जिमेनेजले बराबरी गोल फर्काए । त्यसपछि दुवै टिमले गोल गर्न नसक्दा खेल २२ गोलको बराबरीमा सकियो र दुवैले अंक बाँडे । जिरोनाले भने शुरुवाती दुई गोलको अग्रता जोगाउन नसक्दा ला लिगाको पहिलो खेलमा जित निकाल्न सकेन ।

ला लिगा अन्तर्गत राति नै भएका खेलमा रियल सोसिडाडले सेल्टा डि भिगोलाई ३–२ ले हरायो । सेभिल्ला र इस्पानियोलले १–१ को बराबरी खेल्दै अंक बाँडे । ला लिगा अन्र्तगत आइतबार राति बार्सिलोना र रियल बेटिस तथा डिर्पोटिभो ला कोरुना र रियल म्याड्रिडबीच खेल हुनेछ ।