पेरिस (एजेन्सी)– नेयमार विश्वकै उत्कृष्ट बन्ने सक्ने पेरिस सेन्ट जर्मेन (पिएसजी) का प्रशिक्षक उनेइ इर्मीले बताएका छन् । यो महिनाको सुरुआतमा मात्र ब्राजिलियन स्टार नेयमार बार्सिलोनाबाट विश्व कीर्तिमानी रकम १ सय ९० मिलियन पाउन्डमामा पिएसजी पुगेका थिए ।

नेयमारले गत साता ‘डेब्यू’ गरेको खेलमा पिएसजीले गुइनगाम्पलाई ३–० ले पराजित गरेको थियो । जसमा नेयमारले एक गोल गर्नुका साथै इडिन्सन काभानीलाई गोलका लागि सहयोग गरेका थिए । नेयमारको आगमनले क्लब र उनी दुवैलाई अझै बलियो बनाउन मद्दत गर्ने इर्मीको भनाई छ । व्यक्तिगत रुपमा बालोन डि’ओर जित्नका लागि पनि नेयमारलाई मद्दत गर्ने उनको विश्वास छ ।

‘नेयमार उत्कृष्ट खेलाडी हुन् । उनी विश्वका उत्कृष्ट मध्येका एक हुन्,’ इर्मीले भने भने,‘तर, त्यसका वावजुद पनि ड्रिसिङरुममा उनी अन्य खेलाडीजस्तै सामान्य छन् । सबै खेलाडी राम्रो छन् । पिएसजीमा नेयमारको आगमनले अन्य खेलाडी पन खुसी छन् । हामी त्यहि चाहन्थ्यौं ।’

इर्मीले नेयमारसहित टोलीको विकास चाहेको उल्लेख गर्दै उनलाई विश्वको उत्कृष्ट खेलाडी बनाउन मद्दत गर्ने बताए । उनले थपे ‘हामी उनको लागि अझै राम्रो कसरी गर्न सकिन्छ भन्ने सोचिरहेका छौं । त्यसले हामी पनि उत्कृष्ट टोली बन्न सक्छौं ।’

पहिलो खेलमा नेयमारले गरेको प्रदर्शनबाट इर्मी सन्तुष्ट छन् । उनले गुइनगाम्पसँगको खेलमा रक्षात्मक भूमिकामा पनि साथ दिएका बताए । ‘नेयमारले केही विषेश थपे । उनले लयलाई तीब्र बनाउन सहयोग गरे । उनी टोलीमा राम्ररी घुलमिल भएका छन् । उनको अन्तिम पास, स्तर र गति तारिफ योग्य छ,’ उनले भने,‘ उनले हाम्रो स्तर बढाउन पनि मद्दत गरे । व्यक्तिगत रुपमा र सामूहिक रुपमा पनि उनको प्रदर्शन उच्च थियो । उनले थुप्रै मौका सृजना गर्न पनि भूमिका खेले ।’

प्राविधिक रुपमा पनि उनी सबै चिज गर्न सक्षम रहेको उल्लेख गर्दै प्रशिक्षक इर्मीले भने,‘ उनले आक्रमणमा धेरै भूमिका खेले । ९० मिनेटमा खेलमा उनले रक्षण क्षेत्रमा पनि ध्यान दिए । शारीरिक अवस्थाले पनि उनी सबै गर्न तयार छन् ।’ पिएसजीले आइतबार टाउलोसेको सामना गर्नेछ ।