काठमाडौं (हाम्रो खेलकुद)– एन्फा टेक्निकल सेन्टर सातदोबाटोमा जारी साफ यू १५ च्याम्पियनसिपको दोस्रो दिन आज भारत र माल्दिभ्सबीच प्रतिस्पर्धा हुँदैछ । यी दुईबाहेक समूह ‘बी’ नेपाल पनि रहेको छ । समूह ‘ए’ मा बंगलादेश , श्रीलंका र भुटान छन् ।

बंगलादेशमा सम्पन्न अघिल्लो संस्करणको उप विजेता भारतले तीनै पटक फाइनलको यात्रा तय गरेको थियो । पहिलो पटक सन् २०११ मा नेपालमा भएको प्रतियोगिताको फाइनलमा पाकिस्तानसँग २–१ ले पराजित भारतले दोस्रो संस्करणमा घरेलु टोली नेपाललाई १–० ले हराउदै उपाधि जितेको थियो ।

अघिल्लो पटक भने बंगलादेशसँग १–१ को बराबरी पछि भारत टाइ ब्रेकरमा ४–२ ले पराजित हुदै उप विजेतामा सिमित भएको थियो । अघिल्लो तीन संस्करण यू १६ उमेर समूहमा हुने प्रतियोगिता यसपटक सेप्टेम्बरमा हुने एफिसी यू १६ प्रतियोगितालाई मध्यनजर गर्दै यू १५ मा गरिएको हो ।

माल्दिभ्सका प्रशिक्षकले प्रतियोगितामा राम्रो खेल्ने प्रयास गर्दै सेमिफाइनलसम्म पुग्ने लक्ष्य लिएका छन् । कृतिम मैदानमा खेल्ने बानी परेकाले माल्दिभ्सलाई एन्फाको मैदानमा केहि सहज हुने उनी मान्दछन् । त्यस्तै भारतीय प्रशिक्षकले पनि आफ्नु टोली टर्फमा खेल्दै आएको बताएका छन् । उनका अनुसार भारतीय टोली करिब १ वर्ष देखि प्रशिक्षणमा छ ।

प्रतियोगिताको पहिलो खेलमा शुक्रबार बंगलादेशले श्रीलंका विरुद्ध ४–० ले हराएको थियो । बंगलादेशका लागि अहमद फहिमले ह्याट्रिक गरेका थिए ।