म्युनिख (एजेन्सी)– बायर्न म्युनिखले जितबाट बुन्डेसलिगा उपाधिको रक्षाको यात्रा सुरु गरेको छ । सिजनको पहिलो खेलमा गएराती साविक विजेता बायर्नले घरेलु मैदानमा बायर लेभरकुसेनलाई ३–१ ले हराएको छ । 

बायर्नले सेन्टर ब्याक निकलस सुलेको हेडर गोलमा बायर्नले अग्रता बनाएको थियो । होफेनहायनबाट यसै सिजन बायर्न पुगेका सेबास्टियन रुडीको नवौं मिनेटको फ्रिकिकलाई सुलेले हेड गर्दै गोलमा परिणत गरेका थिए । टोलीका नयाँ खेलाडी कोरेन्टिन टोलिसोले पनि सुरुवातमा प्रभाव देखाए । टोलिसोले १९ औं मिनेटमा कर्नरमार्फत हेड गर्दै घरेलु टोलीको अग्रतालाई दोब्बर पारेका थिए । टोलिसो यसै सिजन लियोनबाट अनुबन्धित भएका हुन् ।

हुरि,वताससहित बर्षाका कारण दोस्रो हाफ १५ मिनेट ढिलो सुरु भएको थियो । पहिलो हाफमा २–० को अग्रता लिएको बायर्नले दोस्रो हाफमा भिडियो असिस्टेन्ट रेफ्री (भिएआर) को सहयोगमा पाएको पेनाल्टीमा तेस्रो गोल गर्यो । बायर्नका रोबर्ट लेवानड्वोस्कीलाई फाउल गरेको निश्चित नहुदा रेफ्रीले भिएआरको मद्दत लिदै बायर्नलाई पेनाल्टी दिए । त्यसमा लेवानड्वोस्कीले सहजै गोल गरे ।

पाहुना टोलीले ६५ औं मिनेटमा अड्मिर मेहमेदीको २० यार्डको गोल मार्फत अन्तर कम गरेपनि त्यसबाहेक कुनै गोल गर्न सकेन । घरेलु मैदानमा एफसी मैन्जसँग २०१६ को मार्चमा पराजित भएयता बायर्नले आफ्नो मैदानमा हारेको छैन । त्यसयता एलिनाज स्टेडियममा भएका २३ खेलमा बायर्नले १८ खेलमा जित र ५ खेलमा बराबरी खेलेको थियो ।