काठमाडौं (हाम्रो खेलकुद) – लगातार दुई खेमा लज्जास्पद हार बेहोरेको नेपाली फुटबल टोलीले शनिबार भिसेल कोबेको यू १८ सँग मैत्रीपूर्ण खेल्दै जापान यात्राको अन्त्य गर्दैछ । नेपाली टोलीको आजको खेल पाँचौ तथा अन्तिम हो । खेल नेपाली समय अनुसार दिउँसो १२ः४५ मा सुरु हुनेछ । भिसेल कोबेको पहिलो टोली जापनिज लिगको शीर्ष श्रेणीको लिगमा प्रतिस्पर्धा गर्छ । 

एएफसी एसियन कप छनोटमा ताजकिस्तानविरुद्ध हुने खेलको अन्तिम तयारीका लागि जापान पुगेको नेपाली टोलीले शनिबार लगातार चौथो खेल खेल्दै छ । पहिलो खेलमा साउन २९ गते गाम्बा ओसाका यू २३ टोलीसँग १–१ को बराबरी गरेयता भोली लगातार चौथो खेल खेल्नेछ । ओसाका यू २३ सँगको दुई दिनपछिको खेलमा क्वान्सी ग्वाक्विन विश्वविद्यालयलाई २–१ ले हराएपछि त्यसपछिका दुई खेलमा नेपालले लज्जास्पद हारको सामना गर्नु परेको थियो ।

जापानको क्षेत्रीय टोली अमिट्सि स्पोर्टस क्लबसँग दोस्रो रोजाईको खेलाडीलाई मौका दिएको टोलीले ५–० को हार चाखेको थियो । तर लगतै भोली पल्ट शुक्रबारको खेलमा पनि अघिल्लो दिनकै नतिजाले निरन्तरता पाएको थियो । हनाम विश्वविद्यालयको खेल नेपालले ६–० ले गुमाएको थियो ।

पहिलो खेलमा नवयुगको गोलले बराबरी गरेको नेपाली टोलीका लागि दोस्रो खेलमा विमल घर्ति मगर र सुमन लामाले गोल गरे । नेपालले चार खेलमा जम्मा जम्मी ३ गोल गर्यो भने १३ गोल खाइसकेको छ । पछिल्ला दुई खेलमा मात्र नेपालले ११ गोलको सामना गर्दा एक गोल फर्काउन सकेन । पाँचौं तथा अन्तिम खेलमा सफल नतिजासहित नेपाल यात्राको अन्त्य गर्ने प्रयासमा भने पक्कै हुनेछ ।

नेपालले भदौ २० गते एसियन कप छनोटको तेस्रो खेलमा ताजकिस्तानसँग घरेलु मैदानमा प्रतिस्पर्धा गर्दैछ । अघिल्लो बर्षको चैतमा फिलिपीन्ससँग ४–१ को हार बेहोरेको नेपालले जेठको अन्त्यमा घरेलु मैदानमा यमनसँग गोलरहित बराबरी खेलेको थियो । तेस्रो खेलमा नेपालले घरेलु मैदानमा अंक तालिकाको पुछारमा रहेको ताजकिस्तानको सामना गर्नेछ ।