काठमाडौँ ( हाम्रो खेलकुद ) – सातदोबाटो स्थित एन्फा टेक्निकल सेन्टरको कृतिम खेल मैदानमा आजबाट सुरु भएको साफ यू-१५ च्याम्पियनसिपको पहिलो खेलमा बंगलादेशले श्रीलंकालाई ४-० ले पराजित गरेको छ ।

तस्बिर : बिबेक सुवेदी / हाम्रो खेलकुद

समुह ‘ए’ को खेलको सुरुवात देखि हावी भएको बंगलादेका लागि मिडफिल्डर मोहम्मद फोयसल अहमद फहिमले ह्याट्रिक गरे । खेलको २८ औं मिनेटमा करिब १० यार्डबाट गोल गरेर अग्रता दिलाएका उनले ३२ औं मिनेटमा अग्रता दोब्बर गरे । करिब २० यार्डबाट गरेको उनको प्रहारले श्रीलंकन गोलरक्षक गिहान सन्दिपालाई कुनै मौका नदिई जाली चुमेको थियो । पहिलो हाफको समाप्ति अघि बंगलादेशका लेफ्ट ब्याक येसिन अराफातले गरेको क्रस सोझै गोलमा परिणत भएको थियो ।

ह्याट्रिक गर्ने क्रममा आफ्नो दोस्रो गोलको खुशियाली मनाउँदै अहमद फहिम(दाँया) । तस्बिर : बिबेक सुवेदी / हाम्रो खेलकुद

पहिलो हाफमा ३-० को अग्रता लिएको बंगलादेशले दोस्रो हाफमा पनि पकड जमायो ।अहमद फहिमले ७६ मिनेटमा गोल गर्दै ह्याट्रिक पुरा गरेका थिए ।

सन् २०११ बाट सुरु भएको च्याम्पियनसिपको अघिल्लो तीन संस्करणमा यू-१६ उमेर समूहमा आयोजना भएको थियो । यसपटक भने सेप्टेम्बेरमा आयोजना हुने यू-१६ एएफसीको प्रतियोगितालाई ध्यान दिदै यू-१५ उमेर समूहमा आयोजना गरिएको हो ।

भोलीको खेलमा समूह ‘बी’ अन्तर्गत भारत र माल्दिभ्स प्रतिस्पर्धा गर्नेछन् ।  समूह ‘बि’ मा रहेको आयोजक नेपालले पहिलो खेलमा सोमबार माल्दिभ्सको सामाना गर्नेछ ।