काठमाडौँ (हाम्रो खेलकुद)– जापानमा रहेको नेपाली राष्ट्रिय फुटबल टोलीले लगातार दोस्रो लज्जास्पद हार बेहोरेको छ । भ्रमणको चौथो खेलमा नेपाली टोली बिहीबार हनाम विश्वविद्यालयको टोलीसँग ६–० को फराकिलो अन्तरले पराजित भएको छ । अघिल्लो दिन बिहीबार टोली जापानको क्षेत्रिय लिग खेल्ने अमिटी स्पोर्टस क्लबसँग ५–० ले पराजित भएको थियो ।

एएफसी एसियन कप छनोटमा ताजकिस्तानविरुद्ध हुने खेलको अन्तिम तयारीका लागि नेपाली टोली जापान पुगेको हो । सुरुआती दुई खेलमध्ये एक खेलमा बराबरी गरेको नेपालले अर्कोमा जित दर्ता गरेको थियो । यसअघिको तीन खेलमा नेपालले एक बराबरी, एक जित र एक खेलमा हारेको सामना गरेको छ । पहिलो खेलमा गाम्बा ओसाका यू २३ सँग आइतबार १–१ को बराबरी गरेको नेपाली टोलीले बुधबार क्वान्सी ग्वाक्विन विश्वविद्यालयलाई २–१ ले हराएको थियो ।

पहिलो खेलमा नवयुग श्रेष्ठले बराबरी गोल गरेका थिए । दोस्रो खेलमा नेपालले विमल घर्ती मगर र सुमन लामाको गोलमा जित निकालेको थियो । शनिबार नेपाली टोलीले बिहिबार भने तेस्रो खेलमा लज्जास्पद हार बेहोरेको थियो । नेपालले शनिबार पाँचौं तथा अन्तिम मैत्रीपूर्ण खेलमा भिसेल कोबे यू १८ सँग प्रतिस्पर्धा गर्नेछ ।

नेपालले भदौ २० गते ताजकिस्तानसँग घरेलु मैदानमा प्रतिस्पर्धा गर्नेछ । छनोटमा दुई खेल खेलिसकेको नेपालको १ अंकसहित तेस्रो स्थानमा छ । ६ अंकसहित शीर्षस्थानमा फिलिपिन्स र ४ अंकसहित यमन दोस्रो स्थानमा छ । ताजिकिस्तानले अंक जोड्न सकेको छैन । समूहको शीर्ष दुई टोलीले एएफसी एसियन कपको अन्तिम चरणमा प्रवेश पाउनेछन् ।