काठमाडौं (हाम्रो खेलकुद) –  दक्षिण एसियाली स्तरको यू–१५ साफ च्याम्पियनसिप आजबाट शुरु हुदैछ । सातदोबाटोस्थित एन्फा कम्ल्पेक्सको खेल मैदानमा आजबाट शुरु हुने यू–१५ साफ च्याम्पियनसिपको पहिलो खेलमा समूह ‘ए’ मा रहेको बंगलादेशले श्रीलंकासँग खेल्दैछ ।

खेल नेपाली समय अनुसार दिउँसो ३ बजेपछि शुरु हुनेछ । बंगलादेश सन् २०१५ को यू–१६ साफ च्याम्पियन टिम हो । सन् २०१५ मा साफ जित्दाको खेलाडीहरु अहिलेको टिममा नभएपनि टोलीले राम्रो खेल्ने बंगलादेशका प्रशिक्षक मुस्ताफा परभेजले १ महिनाको तयारीले टिम प्रतियोगिताको लागि तयार रहेको र उपाधि रक्षा गर्ने अभियानमा प्रयासरत रहने बताए । यस्तै भुटानका प्रशिक्षकले गत मार्चबाट टिमले एकेडेमीमै रहेर प्रशिक्षण गरेका कारण टिमले राम्रो प्रदर्शन गर्ने बताए ।

यता श्रीलंकन टिमका जापनिज प्रशिक्षक सुजुकी चिकासले प्रतियोगिताको लागि तयार रहेको बताए । ‘हामीले जम्मा दुई हप्ताको प्रशिक्षण गरेका छौं । यो प्रतियोगिताको लागि पर्याप्त समय होइन । तैपनि टिम प्रतियोगिताको लागि तयार छ ।’ प्रशिक्षक सुजुकीले भने, ‘खेलाडीहरु खुल्ला छनोटबाट छनोट गरेका छौं । आशा छ टिमले राम्रो प्रदर्शन गर्नेछ ।’

प्रतियोगितामा समूह ‘बी’ मा रहेको आयोजक नेपालले भदौ ५ गते माल्दिभ्सविरुद्ध खेल्दै प्रतियोगिताको शरुवात गर्नेछ । समूह चरणको दोस्रो खेलमा नेपालले भदौं ७ गते चिरपरिचित प्रतिद्धन्द्धी भारतसँग खेल्नेछ । प्रतियोगिताको लागि बिहिबारै २३ सदस्यीय नेपाली युवा टिमको घोषणा भएको छ । नेपाली टिमको कप्तानी रोशन थापामगरले गर्नेछन् । नियमित कप्तान पुथ्वी चौधरी चोटका कारण टिमबाट बाहिर छन् ।

प्रतियोगितामा ६ दक्षिण एसियाली राष्ट्रको सहभागिता रहेको छ । हरेक समूहका शीर्ष दुई टोली सेमिफाइनलमा प्रवेश गर्नेछन् । यसअघि यु–१६ साफ च्याम्पियनसिप हुदै आएकोमा यस पटकदेखि यु–१५ साफ च्याम्पियनसिपको आयोजना गरेको हो ।