काठमाडौँ (हाम्रो खेलकुद)– एएफसी एसियन कप छनोटको तयारीका लागि जापान भ्रमणमा रहेको नेपाली राष्ट्रिय फुटबल टोलीले चौथो मैत्रीपूर्ण खेलमा आज हनाम विश्वविद्यालयको फुटबल टोलीको सामना गर्दै छ ।

यसअघिका तीन खेलमा नेपालले मिश्रित नतिजा बेहोरेको थियो । बिहीबार जापानको क्षेत्रिय लिगमा प्रतिस्पर्धा गर्ने अमिटी स्पोर्टस क्लबसँग ५–० ले हारेको नेपालको यो तीन दिनमा लगातार तेस्रो खेल हो ।

यसअघिको तीन खेलमा नेपालले एक बराबरी, एक जित र एक खेलमा हारेको सामना गरेको छ । पहिलो खेलमा गाम्बा ओसाका यू २३ सँग आइतबार १–१ को बराबरी गरेको नेपाली टोलीले बुधबार क्वान्सी ग्वाक्विन विश्वविद्यालयलाई २–१ ले हराएको थियो ।

पहिलो खेलमा नवयुग श्रेष्ठले बराबरी गोल गरेका थिए । दोस्रो खेलमा नेपालले विमल घर्ती मगर र सुमन लामाको गोलमा जित निकालेको थियो । बिहिबार भने तेस्रो खेलमा लज्जास्पद हार बेहोरेको थियो । शनिबार नेपालले जापानमा लगातार चौथो मैत्रीपूर्ण खेल खेल्नेछ ।

माल्द्धिभ्समा टिसी स्पोट्र्स क्लबसँगको जिम्मेवारीमा रहेका राष्ट्रिय टोलीका नियमित गोलरक्षक किरण चेम्जोङ र इन्डोनेसियामा पेर्सिजा जाकार्ता आबद्ध रोहित चन्द भने जापान भ्रमणमा सामेल छैनन् ।

नेपालले भदौ २० गते ताजकिस्तानसँग घरेलु मैदानमा प्रतिस्पर्धा गर्नेछ । छनोटमा दुई खेल खेलिसकेको नेपालको १ अंकसहित तेस्रो स्थानमा छ । ६ अंकसहित शीर्षस्थानमा फिलिपिन्स र ४ अंकसहित यमन दोस्रो स्थानमा छ । ताजिकिस्तानले अंक जोड्न सकेको छैन । समूहको शीर्ष दुई टोलीले एएफसी एसियन कपको अन्तिम चरणमा प्रवेश पाउनेछन् ।