(एजेन्सी) – इङ्गलिस प्रिमियर लिग क्लब स्टोक सिटीले रियल म्याड्रिडका पूर्व खेलाडी जेसे रोड्रीग्वेजलाई पेरिस सेन्ट जर्मेनबाट लोनमा ल्याएको छ। रियल म्याड्रिडबाट च्याम्पियन्स लिगको उपाधि जितिसकेका जेसेको आगमनसँगै स्टोकमा च्याम्पियन्स लिगको उपाधि जित्ने ५ खेलाडी भएका छन्, जुन लिगमै सर्वाधिक हो।

स्टोक सिटीमा जेसेबाहेक जेर्दान साकिरी, ड्यारेन फ्लेचर, बोयान क्रिकिच र इब्राहिम अफेलाएले पनि च्याम्पियन्स लिगको उपाधि जितेका छन्। साकिरीले बायर्न म्युनिखमा रहँदा च्याम्पियन्स लिग जितेका थिए भने ड्यारेन फ्लेचरले म्यानचेस्टर युनाइटेडबाट खेल्दै उपाधि उक्त जितेका थिए। बोयान र अफेलाएले भने बार्सिलोनामा रहेर सँगै च्याम्पियन्स लिगको उपाधि जितेका हुन्।

स्टोकपछि चेल्सीको टोलीमा ४ जना च्याम्पियन्स लिग विजेता खेलाडी रहेका छन्। डेबिड लुइज र ग्यारी केहिलले चेल्सीमै रहँदा उपाधि जितेका थिए भने पेड्रोले बार्सिलोना र अल्भारो मोराटाले रियल म्याड्रिडबाट जितेका थिए। म्यानचेस्टर सिटीमा भने ड्यानिलो, याया टुरे र क्लाउडियो ब्राभोले च्याम्पियन्स लिग जितेका छन्। ड्यानीलोले म्याड्रिडसँग जितेका थिए भने टुरे र ब्राभोले बार्सिलोनाबाट उपाधि जितेका हुन्।

म्यानचेस्टर युनाइटेडमा माइकल क्यारिक र जुआन माटा रहेका छन् भने एभर्टनमा वायन रुनी र स्यान्ड्रो रामिरेजले उपाधि जितेका छन्। साउथ्याम्पटनबाट चेल्सीका पूर्वखेलाडी रायन बार्टर्यान्ड र ओरिओल रोमेउली जितेका छन्। चेल्सीबाटै उपाधि जितेका पिटर चेक आर्सनलमा र ड्यानीएल स्टरिज लिभरपुलमा रहेका छन्। वेष्ट ह्याममा इन्टरबाट उपाधि जितेका मार्को अर्नाउटोभिच रहेका छन्।