काठमाडौँ (हाम्रो खेलकुद) – जापान भ्रमणमा रहेको नेपाली राष्ट्रिय फुटबल टोलीले बुधबार खेलिएको दोस्रो मैत्रीपूर्ण खेलमा जित हासिल गरेको छ । नेपाल राष्ट्रिय टोलीले कान्साइ गाकुइन विश्वविद्यालयको टोलीलाई २-१ ले पराजित गरेको हो ।

खेलको निर्धारित समयको अन्त्यमा सुमन लामाको गोलसँगै नेपालले अन्तिम समयमा जित हासिल गरेको हो। १-१ को बराबरी तर्फ लम्कदै गरेको खेलमा सुमनले अतिरिक्त समयको पहिलो मिनेटमा गोल गर्दै टोलीलाई जीत दिलाए ।

त्यसअघि खेलको पहिलो हाफमा गोल गर्दै विमल घर्ति मगरले नेपाललाई अग्रता दिलाएका थिए । पहिलो हाफको १२ औं मिनेटमा विमलको गोलमा अग्रता लिएपनि २५औं मिनेटमा गाकुइनले बराबरी गोल गरेको थियो ।

एएफसी एसियन कप छनोटअन्तर्गत अर्को महिना ताजकिस्तानसँग खेल्नुअघि अन्तिम तयारीको लागि जापान पुगेको नेपाली टोलीले पहिलो खेलमा गाम्बा ओसकाको यू–२३ टोलीसँग १ – १ को बराबरी खेलेको थियो । नवयुग श्रेष्ठको गोलबाट नेपाली टोलीले खेलमा बराबरी गरेको थियो ।

नेपालले बिहिबार अमिटि स्पोर्टस क्लबको सामाना गर्ने छ। अमिटि जापानको क्षेत्रीय लिगमा प्रतिस्पर्धा गर्ने टोली हो। उक्त लिग जापानको लिग संरचना अनुसार पाँचौ श्रेणीको लिग हो ।

नेपालले खेल्ने सम्पूर्ण खेलको तालिका यहाँ हेर्नुहोस ।

२४ सदस्यीय भ्रमण टोलीमा राष्ट्रिय टोलीका दुई नियमित सदस्य गोलकिपर किरण चेम्जोङ र रोहित चन्द भने सहभागी छैनन्। किरण माल्दिभ्स र रोहित इन्डोनेसियामा व्यवसायिक फुटबल खेलिरहेका छन् । ताजकिस्तानसँगको खेलका लागि भने उनीहरु स्वदेश फर्कनेछन् ।