च्याम्पियन्स लिग प्ले-अफ

होफेनहायम (एजेन्सी) – लिभरपुलले च्याम्पियन्स लिग प्ले अफको पहिलो लेगमा अग्रता लिएको छ । लिभरपुलले गएरातीको खेलमा घरेलु टोली होफेनहायमलाई २–१ ले हराएको छ । 

ट्रेन्ट एलेक्सजान्डर आर्नोल्डको गोलमा अग्रता लिएको लिभरपुलले हाभार्ड नोर्डभेटको आत्मघाती गोलमा अग्रता दोब्बर पारेको थियो । मार्क हुथले खेलको अन्तिम समयमा गोल गर्दै घरेलु टोलीलाई प्रतिस्पर्धामा राखेका थिए ।

क्लबको इतिहासमा पहिलो पटक च्याम्पियन्स लिगको प्ले अफ खेलेको घरेलु टोलीले खेलमा राम्रो सुरुवात गरेपनि अग्रता लिने अवसर भने गुमाएको थियो । लिभरपुलको डिफेन्डर डेजान लोभ्रेनले ९ औ मिनेटमा पेनाल्टी बक्समा फाउल गरेपछि पाएको पेनाल्टीलाई लेस्टर सिटीका पूर्व स्ट्राइकर एन्द्रेज क्रामारिकले सोझै सिमोन मिग्नोलेको हातमा प्रहार गरे ।

लिभरपुलले आर्नोल्डको उत्कृष्ट फ्रिकिक गोलमा ३५ औं मिनेटमा अग्रता लियो । नियमित राइट ब्याक नेथेनियल क्लाइनको अनुपस्थितिमा स्थान पाएका १८ वर्षीय आर्नोल्डले ढाडको चोटका कारण खेल्न नसकेका कौटिन्होको कमि महसुस हुन् दिएनन् । टोलीका लागि कौटिन्हो नियमित फ्रिकिक हान्ने खेलाडी हुन् ।

होफेनहायमले १ गोलले पछि परेपनि खेलमा पकड जमायो तर गोल भने गर्न सकेन । केही गोल गर्ने अवसरमा चुकेको घरेलु टोली ७४ औं मिनेटमा अर्को गोलको सामना गरेको थियो । लिभरपुलको कप्तान जोर्डन हेन्डरसनको स्थानमा मैदान प्रवेश गरेका जेम्स मिल्नरले मोहोमद सलाह तर्फ क्रस गरेको बल होफेनहायमका डिफेन्डर नोर्डभेटलाई ठोकिदै गोल हुन पुगेको थियो ।

उथले खेल सकिन तीन मिनेट बाँकी रहँदा गोल गरेपछि होफेनहायमले गोलअन्तर घटाउन सफल भएको थियो । उथले करिब १५ यार्डबाट गरेको शक्तिशाली प्रहारलाई रोक्न लिभरपुलका किपर मिग्नोलेले कुनै अवसर पाएनन् ।

च्याम्पियन्स लिग प्ले अफमा गएराती अन्य खेलका नतिजा

काराबाग १–० कोभेनहाम
एपोएल निकोसा २–० स्लाभिया प्रेग
स्पोर्टिङ्ग सीपी ०–० एफसी एफसीएसबि
यंग ब्याइज ०–१ सिएसकेए मस्काव