होफेनहायम (एजेन्सी) – च्याम्पियन्स लिग प्ले अफ अन्तर्गतको खेलमा लिभरपुलले जर्मन क्लब होफेनहायमको सामना गर्दै छ । प्ले अफको पहिलो लेग होफेनहायमको घरेलु मैदानमा हुनेछ ।

वाट्फर्डसँग अग्रता गुमाउदै प्रिमियर लिगमा बराबरीसँगै सिजनको सुरुवात गरेको लिभरपुलले सिजनको दोस्रो खेलमा होफेनहायमको सामना गर्नेछ । आफ्नो महत्वपूर्ण खेलाडी कौटिन्होको भविष्य अन्योलमा रहँदा लिभरपुलले पहिलो लेगमा उनको साथ पाउने छैन । वाट्फर्डसँगको खेल गुमाएका ब्राजिलियन मिडफिल्डर ढाडको चोटको कारण यार्गन क्लपको टोलीमा छैन । त्यस्तै अर्का मिडफिल्डर एडम लालानाले पनि खेल गुमाउने छन् । होफेनहायम लिभरपुलको नयाँ ९ नम्बरका खेलाडी रोबर्टो फर्मिनो सन् २०१५ मा २९ मिलियन पाउण्डमा लिभरपुलसँग आबद्ध भएका थिए र भूतपूर्व टोलि बिरुद उनि पहिलो पल्ट मैदानमा उत्रिने छन्।

होफेनहायमका युवा प्रशिक्षक जुलियन नागेल्समान युवा जोशमा साथ मैदानमा टोलीलाइ उतार्ने छन्। होफेनहायमका तत्कालिन प्रशिक्षक हब स्टेभेन्स अस्वस्थताका कारण क्लब छाड्दा ११ फेब्रुअरी २०१६ मा ३०वर्षीय नागेल्समानले उनको पद सम्हालेका थिए ।

होफेनहायमले जर्मन लिगको तेस्रो श्रेणीको क्लब इर्फर्टसँग जर्मन कपमा १-० को जितबाट सिजनको सुरुवात गरेको थियो । अघिल्लो सिजन जर्मन लिग बुन्डेसलिगामा चौथो हुदैँ क्लबको इतिहासमा पहिलो पटक च्याम्पियन्स लिगको प्ले अफ खेल्दै छ ।