ग्वेनगाम्प (एजेन्सी) – पेरिस सेन्ट जर्मेन (पिएसजी)मा विश्व कीर्तिमानी ट्रान्सफर पुरा गरेर आएका ब्राजिलियन फरवार्ड नेयमारले आफ्नो डेब्यु खेलमा उत्कृष्ट प्रदर्शन गरेका छन्। उनले आफ्नो डेब्युमै १ गोल र  असिस्ट प्रदान गरेका हुन्।

नेयमारबिनाको पहिलो खेल २-०ले जितेको पेरिसले दोश्रो खेलमा ३-०को जित दर्ता गर्दै शत प्रतिशत जितको सिलसिलालाई कायमै राखेको हो। नेयमारले पिएसजीको तीनओटै गोलमा महत्त्वपूर्ण भूमिका खेलेका थिए। पहिलो गोलमा उनकै पासमा बल बक्सभित्र पुगेपछि आत्मघाती गोल भएको थियो भने कभानीले गरेको दोश्रो गोलमा नेयमारकै असिस्ट थियो। उनले खेलको अन्त्यतिर कभानीको पासमा गोल गर्दै उत्कृष्ट प्रदर्शनलाई सार्थक बनाएका थिए।

४-३-३को पद्दतिमा खेलेको पिएसजीको लागि नेयमार बायाँतर्फ खेलेका थिए। उनले आक्रमणमा जाँदा थप स्वतन्त्रता पाएका थिए जसकारण विपक्षी डिफेन्डरलाई उनलाई रोक्न हम्मे-हम्मे पारेको थियो। उनले गरेको धेरै प्रहार विपक्षी गोलरक्षकले रोकेपनि उनले गोल गर्न सफल रहे।

डेब्युमा नेयमारको प्रदर्शन (उनकै टोलीका कभानी र डी मारियासँग दाँजेर हेर्दा):

सट –  नेयमार ६, कभानी ६, डी मारिया ६

पास – नेयमार ८८, कभानी २१, डी मारिया ६३

पास एक्युरेसी – नेयमार ७६%, कभानी ९१%, डी मारिया ८६%

महत्त्वपूर्ण पास – नेयमार ७, कभानी २, डी मारिया ०

विपक्षीसँग आमनेसामने – नेयमार २२, कभानी ४, डी मारिया७

विपक्षीसँग आमनेसामने सफलता – नेयमार ७३%, कभानी ५०%, डी मारिया २९%