बार्सिलोना (एजेन्सी) – क्याम्प नोउमा भएको स्पेनिस सुपर कपको पहिलो लेगको खेलमा रियल म्याड्रिडले घरेलु टोलीलाई ३-१ले पराजित गर्यो। उक्त खेलमा रियलका लागि रोनाल्डोले रातो कार्ड पाएका थिए।

पहिलो रोजाइमा नपरेका कारण ५८औं  मिनेटमा मैदान प्रवेश गरेका स्टार फरवार्ड क्रिस्टियानो रोनाल्डोले ८०औं मिनेटमा उत्कृष्ट गोल गरेपछि रियलले खेलमा पुन: अग्रता लिएको थियो। रोनाल्डोले इस्कोको पास लिएर पिकेलाई छक्याउँदै बक्स बाहिरबाट गरेको प्रहार टप कर्नरमा उत्कृष्ट ढंगले छिरेको थियो। उनले उक्त गोलको खुशी मनाउने क्रममा जर्सी उतारेपछि पहेंलो कार्ड पाएका थिए।

त्यसको १ मिनेटपछि रोनाल्डो अर्को आक्रमणका क्रममा बक्सभित्र बार्सिलोनाका स्यामुएल उम्टिटीले फल हानेको जनाउदै बक्सभित्र लडे। तर, रेफ्रीले रोनाल्डोलाई फल नहानेको र उनले डाइभ दिएको आरोपमा दोश्रो पहेंलो कार्ड देखाउँदै रातो कार्ड दिए। रेफ्रीले दोहोरो पहेंलो कार्ड देखाएपछि रोनाल्डोले रेफ्रीलाई हातले पेलेका थिए। यसकारण उनले अझै बढी प्रतिबन्ध खेप्नुपर्ने सम्भावना बढेको छ।

रियलले रोनाल्डोको दोश्रो पहेंलो कार्डविरुद्ध अपिल गर्ने सम्भावना पनि रहेको छ। तर रेफ्रीलाई पेलेको कारण अनुशासनको कारवाहीमा पर्ने भएकाले उनले अर्को खेल गुमाउने सम्भावना प्रबल छ।