ग्वेनगाम्प (एजेन्सी) – विश्व कीर्तिमानी ट्रान्सफरमा बार्सिलोनाबाट पेरिस सेन्ट जर्मेन (पिएसजी) पुगेका ब्राजिलियन फरवार्ड नेयमारको डेब्यु खेलमा पिएसजीले ग्वेन्गाम्पमाथि ३-०को सहज जित दर्ता गरेको छ। यस जितसँगै पिएसजीको २ खेलमा ६ अंक भएको छ।

पिएसजीले खेलमा निरन्तर आक्रमण बुनेपनि पहिलो हाफमा कुनै गोल गर्न सकेको थिएन। उसले ५२औं मिनेटमा आत्मघाती गोलको मद्दतले अग्रता लिएको थियो। घरेलु टोलीका डिफेन्डर जोर्डन इकोकोले बक्सभित्रबाट हतारमा गोलरक्षकलाई ब्याकपासदिएको बल गोलरक्षकले सम्हाल्न नसक्दा गोलमा परिणत भएको थियो।

त्यसपछि थप आक्रामक बनेको पिएसजीले ६२औं मिनेटमा अग्रता दोब्बर पार्यो। नेयमारको उत्कृष्ट थ्रु पासमा फरवार्ड एडिन्सन कभानीले गोल गर्दै टोलीलाई २-०ले अगाडी बढाए। ८२औं मिनेटमा नेयमारले पनि गोल गर्दै पिएसजीका लागि डेब्युमै खाता खोले। उनले कभानीको पासमा सहजै गोल गर्दै पिएसजीको लागि पहिलो गोल गरेका थिए।

प्रशिक्षक उनाइ एमेरीले नेयमारलाई बायाँ फरवार्डका रुपमा खेलाएपनि फरवार्ड लाइनमा घुम्ने स्वतन्त्रता दिएका थिए। नेयमारको मुभमेन्टले विपक्षी डिफेन्डरलाई निकै कठिन भएको थियो। पिएसजी गोल अन्तरका कारण अंक तालिकाको दोश्रो स्थानमा रहेको छ। पिएसजीसँगै अन्य ५ टोलीले पनि आफ्नो सुरुवाती २ खेल जितेका छन्।