म्यानचेस्टर (एजेन्सी)– म्यानचेस्टर युनाइटेडले दमदार ढंगले इङ्लिस प्रिमियर लिगको सुरुआत गरेको छ । आइतबार वेस्ट ह्यामलाई ४–० ले हराउदै म्यानचेस्टर युनाइटेडले नयाँ सिजनको सानदार सुरुआत गरेको हो । पहिलो खेलमा ४ गोल गरेपछि युनाइटेड तीन दिनअघि सुरु भएको लिगको अंक तालिकाको शीर्ष स्थानमा पुगेको छ ।

घरेलु मैदान ओल्ड ट्राफर्डमा युनाइटेडले खेलको सुरुआत देखि पकड जमायो । काउन्टर एट्याकमा धारिलो देखिएको युनाइटेडले ३३ औं मिनेटमा रोमेलु लुकाकुको गोलबाट अग्रता लियो । यो सिजन एभर्टनबाट युनाइटेड पुगेका लुकाकुको लिगमा युनाइटेडबाट त्यो ‘डेब्यू’ खेल थियो ।

नेमान्जा म्याटिचले मिडफिल्डमा बलमा पकड खोसेपछि सुरु भएको काउन्टर एट्याकमा मार्कस रास्फार्डको पासमा लुकाकुले हानेको प्रहार पहिलो पोस्टमा लाग्दै गोलमा परिणत भयो । दोस्रो हाफमा लुकाकुले हेनरिक मेखेतेरियनको फ्रिकिकमा हेडर मार्फत गोल गर्दै युनाइटेडको अग्रता दोब्बर गरे । त्यस्तै ७९ औं मिनेटमा रास्फार्डलाई परिवर्तन गर्दै मैदान प्रवेश गरेका एन्थोनी मार्सियलले ८७ औं मिनेटमा युनाइटेडलाई तेस्रो गोल दिलाए ।

म्याटिचको आगमनसँगै मिडफिल्डमा स्वतन्त्र देखिएका पौल पोग्बाले ९० औं मिनेटमा करिब २० यार्डबाट गोल गर्दै युनाइटेडको जितलाई थप सहज बनाए । मिडफिल्डमा पाएको मार्सियलको पासपछि पोग्बाले आफुलाई स्पेस बनाउदै गरेको विश्वस्तरिय प्रहारले वेस्ट ह्यामका किपर जो हार्टलाई कुनै मौका दिएन ।

टोटेनह्यामको सहज जीत

दस खेलाडीमा सिमित न्युकासल यूनाइटेडलाई २–० ले हराउदै टोटेनह्याम हटस्पर्सले प्रिमियर लिगमा सुखद सुरुआत गर्यो । पहिलो हाफ गोलरहित रहेपनि दोस्रो हाफमा प्रिमियर लिगको नवप्रवेशी न्युकासलका कप्तान जोन्जो शेल्भी सोझै रातो कार्डको सामना गर्दै बाहिरिएपछि टोटेनह्यामले खेलको दोस्रो हाफ आफ्नो कब्जामा राख्यो । टोटेनह्यामका मिडफिल्डर डेले अलीलाई जानी जानी खुट्टामा टेकेपछि शेल्भीले सिधै रातो कार्ड पाए ।

टोटेनह्यामले ६१ औं मिनेटमा अलीको गोलमा अग्रता पायो । ह्यारी केन र क्रिस्टियन एरिक्सनको साझेदारीपछि एरिक्सनको क्रसलाई ट्याप गर्दै अलीले टोटेनह्यामलाई अग्रता दिलाए । स्पर्सले ७० औं मिनेटमा बेन डेभिसको गोलमा अग्रता दोब्बर पार्यो ।