लन्डन (एजेन्सी)– साविक विजेता चेल्सीले हारबाट इङ्लिस प्रिमियर लिगको नयाँ सिजनको सुरुआत गरेको छ । ९ खेलाडीमा सिमित हुँदै खेलको अन्त्य गरेको चेल्सी घरलु मैदानमा शनिबार बर्नलीसँग ३–२ ले पराजित भएको छ ।

चेल्सीका कप्तान ग्यारी केहिल १४ औं मिनेटमा । रातो कार्ड खाँदै मैदान बाहिरिएपछि चेल्सी पहिलो हाफमै ३–० ले पछि परेको थियो । बर्नलीका स्टेफन डेफोरलाई बल नहुँदा प्रहार गरेको ट्याकल लागेपछि रेफ्रीले केहिललाई रातो कार्ड देखाएका थिए । त्यसको फाइदा उठाउँदै स्याम भोक्सले खेलको २४ औं मिनेटमा गोल गर्दै बर्नलीलाई अग्रता दिलाएका थिए ।

३९औं मिनेटमा स्टेफन वार्डले उत्कृष्ट गोल गर्दै अग्रतालाई २–० बनाए । उनले जयक कर्कको पासमा उत्कृष्ट ढंगले बल रोकेर भली प्रहारमा गोल गरेका थिए । पहिलो हाफका लागि ३ मिनेट बाँकी रहँदा भोक्सले अर्को गोल थपे । उनले डेफोरको क्रसमा हेडरमार्फत गोल गरेका थिए ।

दोस्रो हाफमा पनि खेलमा रोमाञ्चकता जारी रह्यो । अल्भारो मोराटाले ६९ औं मिनेटमा गोल फर्काउँदै चेल्सीलाई खेलमा फर्काउने प्रयास गरका थिए । मोराटाले विलियन्सको पासमा गोल गरेका थिए ।

तर ८१ औं मिनेटमा सेस फाब्रिगासले रातो कार्ड पाउँदै मैदान छाडेपछि खेलमा फर्कने चेल्सीको सम्भावना थप कमजोर बनेको थियो । खेल सकिन २ मिनेट बाँकी रहँदा डेभिड लुइजले गोल गरेपछि चेल्सीले गोलअन्तर कम गरायो । तर त्यसपछि टोलीले अर्को गोल गर्न सकेन र सिजनको पहिलो खेलमै हार आत्मसात गर्न बाध्य भयो ।

शनिबारका अन्य खेलमा वार्टफोर्ट र लिभरपुलले ३–३ , साउथह्याम्टन र स्वान्सीले गोलरहित बराबरी खेलेका थिए । हर्डरफिल्डले क्रिस्टल प्यालेसमाथि ३–०, एभर्टनले स्टोक सिटीलाई र वेस्ट ब्रुमबीचले बोर्नमाउथलाई समान १–० ले हराएको थियो ।