लन्डन (एजेन्सी)– लिभरपुल मिडफिल्डर फिलिप कौटिन्होले सरुवाका लागि क्लबसँग लिखित रुपमा माग गरेका छन्। कौटिन्हो बिक्रीमा नरहेको प्रिमियर लिग क्लबले प्रेस विज्ञप्ती जारी गरेको एक घन्टा पछि नै शुक्रबार उनले क्लबसँग इमेलमार्फत सुरुवाको लागि अनुरोध गरेको स्काइ स्पोर्टसले जनाएको छ। तर क्लबले उनको अनुरोधलाई अस्वीकार गरेको बताइएको छ।

ब्राजिलियन मिडफिल्डरका लागि बार्सिलोनाले राखेको एक सय मिलियन युरोको प्रस्तावलाई लिभरपुलले बुधबार अस्वीकार गरेको थियो । चोटका कारण २५ बर्षे खेलाडी शनिबार वाटफर्ड सँगको खेलमा उपलब्ध हुने छैनन् । क्लबका मालिकहरुले शुक्रबार प्रेस विज्ञप्तीमार्फत कौटिन्होका लागि कुनै पनि प्रस्ताव स्वीकार नगर्ने जनाएका थिए ।

क्लबका प्रशिक्षक योर्गन क्लपले ब्राजिलियन मिडफिल्डरले चोटका कारण सिजनको सुरुआतका खेल गुमाउने बताएका थिए । अघिल्लो शुक्रबारदेखि अभ्यासमा नरहेका कौटिन्होले मंगलबार होफेहिमसँग हुने च्याम्पियन्स लिग प्ले अफको पहिलो लेग पनि गुमाउने सम्भावना छ ।जनवरीमा पाँच बर्षे नयाँ सम्झौता गरेका काउटिन्होले पछिल्लो सिजन सबै प्रतियोगितामा १४ गोल गरेका थिए । उनी सन् २०१३ मा ८.५ मिलियन पाउन्डमा लिभरपुल पुगेका थिए ।

बार्सिलोनाले २० बर्षे फरवार्ड ओसमाने डेम्बेलेका लागि राखेको प्रस्तावलाई बोरुसिया डर्टमन्डले अस्वीकार गरेको थियो । टोलीका मुख्य खेलाडीमध्येका एक नेयमारलाई विश्व कीर्तिमानी रकममा पेरिस सेन्ट जर्मेनलाई बेचेपछि बार्सिलोना खेलाडी भित्राउने तयारीमा जुटेको छ ।