टुरिन (एजेन्सी) – इटालियन क्लब युभेन्टसका अर्जेन्टिनी स्ट्राइकर पाउलो डिबालाले क्लबको ऐतिहासिक १० नम्बर अंकित जर्सी लगाउने भएका छन्। युभेन्टसका लागि दिग्गज खेलाडीहरुले यो जर्सी लगाउँदै आएका यस जर्सी क्लंले उनलाई सुम्पेको हो।

यसअघिका सिजनमा २१ नम्बर जर्सीमा देखिएका डिबालाले यस पटक १० नम्बर जर्सी लगाउने क्लबले पक्का गरेको हो। पछिल्लो पटक मिडफिल्डर पल पोग्बाले यस जर्सी लगाएका थिए। विगतमा क्लबका लागि लामो समय खेलेका खेलाडी एलेसान्द्रो डेल पिएरो, रोबर्टो बाजीयो लगायतका खेलाडीले पनि यो जर्सी प्रयोग गरेका थिए। अर्जेन्टिनाका लागि लिओनेल मेस्सी, डिएगो म्याराडोना लगायतका मुख्य खेलाडीले पनि यहि जर्सी पहिरिने गरेका छन्।

२३ वर्षीय फरवार्ड डिबालाले गत सिजन ४८ खेलमा १९ गोल गरेका थिए। उनको प्रदर्शनमा युभेन्टसले कीर्तिमानी लगातार छैटौं पटक इटालियन लिगको उपाधि जितेको थियो। उनको प्रदर्शनबाट प्रभावित भएर विभिन्न युरोपेली महारथी क्लबले उनलाई भित्र्याउन प्रस्ताव तयारी गरिरहेका छन्। तर युभेन्टसले भने उनलाई १० नम्बर जर्सी दिएर उनको टोलीमा धेरै महत्त्व रहेको र कतै नजाने संकेत दिन खोजेको छ।

युभेन्टसले आगामी दिनमा डिबालाकै ओरपर रहेर टोली विस्तार गर्ने निर्णय लिएको छ। युवा अवस्थाका डिबालाले आफुलाई टोलीका महत्त्वपूर्ण खेलाडीका रुपमा स्थापित गरिसकेका छन्। युभेन्टस गत सिजन च्याम्पियन्स लिगको फाइनलमा पराजित भएको थियो र यस सिजन त्यसलाई सुधार्ने क्लबको मुख्य लक्ष्य हुनेछ। यसका लागि क्लबले ट्रान्सफर विन्डोमा पनि मिहेनत गरिरहेको छ।