काठमाडौं (हाम्रो खेलकुद)– फिफा वरियतामा नेपाल एक स्थान माथि उक्लेको छ । विश्व फुटबलको सर्वोच्च निकाय फिफाले बिहीबार अगस्ट महिनाका लागि सार्वजनिक गरेको वरियतामा नेपाल १ सय ६९ औं स्थानमा छ । अघिल्लो महिना नेपाल १ सय ७० औं स्थानमा थियो ।

जुन महिनामा नेपालले एसियन कप छनोटअन्तर्गत यमनसँग हलचोकमा गोलरहित बराबरी खेलेको थियो भने भारतसँगको मैत्रीपूर्ण खेल २–० ले गुमाएको थियो । त्यसयता नेपालले कुनै प्रतिस्पर्धात्मक खेल खेलेको छैन । एसियन कप छनोटअन्तर्गत अर्को महिना ताजकिस्तानसँग हुने खेलको तयारीका लागि नेपाली टोली आज जापान जाँदैछ ।

फिफाको वेभसाइटका अनुसार ९७ औंमा रहेको भारत दक्षिण एसियाली राष्ट्रमा शीर्षस्थानमा यथावत छ । भारत यसपटक एक स्थान तल झरेको छ । १ सय ४२ औं फिफा वरियतामा रहेको माल्दिभ्स दक्षिण एसियाली राष्ट्रमध्ये दोस्रोमा छ । त्यस्तै भुटान १ सय ६५ औं तथा नेपाल भन्दा पछि बंगालादेश १ सय ८९ औं, श्रीलंका १ सय ९७ औं र पाकिस्तान २ सयौं स्थानमा छ ।

ब्राजिल फिफा वरियताको शीर्षस्थानमा उक्लेको छ । जर्मनी दोस्रो स्थानमा झरेको छ भने अर्जेन्टिना तेस्रो, स्विट्जरल्यान्ड चौथो, पोल्यान्ड पाँचौं स्थानमा छ । पोर्चुगल, चिली, कोलम्बिया, बेल्जियम र फ्रान्स क्रमश ः छैटौंदेखि दसौं स्थानमा छन् ।