लन्डन (एजेन्सी) – इङ्गलिस प्रिमियर लिग सिजन २०१७/१८को पहिलो खेलमा शुक्रबार आर्सनल र लेस्टर भिड्दैछन्। आर्सनलको घरेलु मैदानमा हुने खेलमा स्टार खेलाडी एलेक्सिस स्यान्चेज र मेसुट ओजिल भने उपस्थित हुने छैनन्।

स्यान्चेज र ओजिल दुवै खेलाडी चोटका कारण विश्राममा छन्। गत साता भएको कम्यूनिटी सिल्डको खेलमा पनि दुवै खेलाडी दर्शकदिर्धामा रहेका थिए। आर्सनलले उक्त खेल पेनाल्टी सुटआउटमा जितेको थियो र त्यसै जितको सिलसिलालाई यस खेलमा पनि निरन्तरता दिने सुरमा हुनेछ। आर्सनलका प्रशिक्षक आर्सेन वेंगरले यस सिजन प्रिमियर लिगकै उत्कृष्ट सिजन हुने दाबी गरे। उनले यसपटक ७ क्लबले उपाधि जित्ने दावेदारी प्रस्तुत गर्ने बताए। गत सिजन शीर्ष ४ मा रहेका क्लबसँगै आर्सनल, म्यानचेस्टर युनाइटेड र एभर्टन उपाधिको लागि सक्षम रहेको बताए।

यता लेस्टरले ट्रान्सफर विन्डोमा ३ खेलिद भित्र्याएर आफ्नो टोलीलाई थप मजबुत पारेको छ। फरवार्ड केलेची इहेनाचो, डिफेन्डर ह्यारी मगाएर र मिडफिल्डर भिसेन्टे इबोर्राको आगमनसँगै टोली थप मजबुत भएको छ। तीनै खेलाडीले आर्सनल विरुद्धको खेलमा खेल्ने अपेक्षा गरिएको छ। इहेनाचो भने पछिल्लो खेलमा घाइते भएकाले पुरा ९० मिनेट खेल्न सक्नेमा शंका छ।

यता आर्सनलली यसी ट्रान्सफरमा भित्र्याएका फरवार्ड एल्क्जेन्दर लाकाजेट र डिफेन्डर सियाद कोलासिनाच पनि टोलीमा रहनेछन्। लाकाजेटले प्रि सिजनमा राम्रो प्रदर्शन गरेका छन् भने कोलासिनाचले गत साताको कम्युनिटी सिल्डमा बराबरी गोल गरेका थिए। वेंगरले यस पटक टोलीको प्रि सिजन राम्रो रहेकाले सुरुवात पनि त्यस्तै रहने विश्वास व्यक्त गरे।