पेरिस (एजेन्सी)– नेयमारलाई विश्व कीर्तिमानी रकममा भित्राइसकेको फेन्च क्लब पेरिस सेन्ट जर्मेन (पिएसजी) ले अर्का स्ट्राइकरलाई ल्याउने तयारीमा जुटेको छ । पिएसजीले फ्रान्सेली सनसनी केलियन बाप्पेलाई मोनाकोबाट किन्ने प्रयास सुरु गरिसकेको बताइएको छ । बार्सिलोनाबाट नेयमार ल्याउन पिएसजीले १ सय ९८ मिलियन पाउन्ड खर्चेको थियो ।

मोनाकोका स्टार केलियन बाप्पे

गत सिजन सोचे अनुरुपको सफलता हात पार्न नसकेपछि पिएसजी यो सिजन आक्रमक रुपमा प्रस्तुत हुने तयारीमा देखिएको छ । पिएसजीअघि लिभरपुल, आर्सनल, म्यानचेस्टर सिटी, बार्सिलोना, रियल म्याड्रिडले पनि बाप्पेमाथि चासो देखाएका थिए । तर, बाप्पे फ्रान्समै बस्ने सम्भावना बढेर गएको बताइएको छ ।

पिएसजीले १ सय ६२ मिलियन पाउन्डमा बाप्पले लिन सक्ने बताइएको छ । प्रि सिजनका दौरान पिएसजीका प्रशिक्षक युनिया इमिरी र बाप्पेका एजेन्ट जर्ज मेन्डिसबीच भेट भएको बताइएको छ ।

कतारी मालिक रहेको पिएसजीले यदि बाप्पेसँगको सम्झौता सफल भएको खण्डमा तीन स्ट्राइकर नेयमार, काभानी र बाप्पेका लागि ४ सय ५० युरो भन्दा बढी खर्चनेछ । यसैबीच, सिटीका प्रशिक्षक पेप ग्वार्डिओलाले पनि बाप्पेलाई भित्राउन हरसम्भव प्रयास गरिरहेको बताइएको छ । रियलले पनि उनीमाथिको चासो हटाइसकेको छैन ।